“Oyunçuları 1 ay buraxmaq istəyirəm ki, gedin, futboldan uzaq olun”

Tarix: 29 Noyabr 2025 20:36

"Qarabağ" futbolçularının iş rejiminə baxanda yazığım gəlir. Bəzən onları 1 ay buraxmaq istəyirəm ki, gedin, futboldan uzaq olun".

Sonxeber.net qafqazinfo-ya istinadən xəbər verir ki, bunu "Qarabağ"ın baş məşqçisi Qurban Qurbanov jurnalistlərə açıqlamasında deyib.

"Bilirəm ki, onlar üçün heç də asan deyil. Çünki biz istənilən turnirdə nəticə verməliyik. Komanda elə yerə gəlib çıxıb ki, futbolçuların normal istirahət vaxtı yoxdur. Gedirlər evə, yatıb-durub yenidən bazaya gəlirlər. Buna nəinki fiziki, psixoloji güc də çatmır. Baş məşqçi olaraq heç mənim üçün də asan deyil. Halbuki mən onlar qədər fiziki güc sərf etmirəm.

Yəni onları başa düşmək lazımdır. Onlar da bizim üçün, xalqımız üçün, ailəsi üçün oynayır. Çox adam fikirləşir ki, mənim də övladım futbolçu olsun. Amma inanın ki, bunlar sanki seçilmiş insanlardır. Döyülən də, söyülən də onlardır. Nəsə bir çatışmazlıq olanda onların üzərinə çox gedilir. Böyük təzyiqlərə məruz qalırlar. Ona görə həmişə deyirəm ki, futbolçuların yanında olmalıyıq", - o, əlavə edib.