Ruslan Abışov ''Neftçi''dən ayrılır - Jezniçak gəlir?

Tarix: 8 Iyun 2019 14:40

Ruslan Abışov "Neftçi"dən ayrılmaq istəyir.

Futbolçunun yaxın ətrafından Qol.az-a bəlli olub ki, 31 yaşlı müdafiəçi karyerasını başqa klubda davam etdirmək niyyətindədir. Buna səbəb onun ehtiyatda oturmaq istəməməsidir.

Əldə etdiyimiz digər məlumata görə, "Qəbələ"dən Voislav Stankoviçi transfer edən "ağ-qaralar" mövsümün sonunda "Qarabağ"dan ayrılan Yakub Jezniçakı da heyətinə qatmaq fikrindədir. Polşalının da keçidi alınsa, onda Kiril Petrov və Mamadu Mbodjla birlikdə "Neftçi"də əcnəbi mərkəz müdafiəçilərinin sayı 4-ə çatacaq. Onların kölgəsində qalmaq istəməyən Ruslanın məhz bu səbəbdən komandadan getmək istədiyi bildirilir. Futbolçunun sabah "Neftçi"nin baş məşqçisi Roberto Bordinlə görüşündən sonra məsələyə tam aydınlıq gələcək.

Artıq Abışovun xidmətində maraqlı olan klublar da var. "Qarabağ" və "Səbail"dən başqa, Premyer Liqanın digər 6 təmsilçisi təcrübəli futbolçuya təklif göndərib. Ancaq Ruslanın hələlik seçim etmədiyi deyilir.

Qeyd edək ki, 2003-2012-ci illərdə "Neftçi"nin formasını geyən Ruslan daha sonra "Xəzər Lənkəran", "Rubin", "Qəbələ" və "İnter" kimi komandalarda oynayıb. Müdafiəçi 2017-ci ildə yenidən "ağ-qaralar"a qayıdıb.