Əyani tədrisin bərpası nə vaxt gözlənilir? - Təhsil Nazirliyindən açıqlama

Tarix: 2 Aprel 2021 12:40

"Distant tədrisə keçmiş təhsil müəssisələrinin yenidən əyani tədrisə geri dönüşü təbii ki, mövcud sanitar-epidemioloji vəziyyətdən, yəni yoluxmaların sayından asılıdır. Təhsil Nazirliyinin dünən Səhiyyə Nazirliyinin müvafiq rəyi əsasında verdiyi qərar yoluxmanın daha çox olduğu 5 region üzrə ümumtəhsil və məktəbdənkənar təhsil müəssisələrinin distant təhsilə keçməsi ilə bağlıdır". 

Bunu APA-ya açıqlamasında Təhsil Nazirliyinin Ümumi təhsilin təşkili və idarəolunması şöbəsinin müdiri Rəşad Tağıyev bildirib. Onun sözlərinə görə, həmin təhsil müəssisələrinin yenidən əyani tədrisə geri dönüşünə yoluxma sayından asılı olaraq qərar veriləcək. 

Qeyd edək ki, Təhsil Nazirliyinin ötən gün verdiyi qərara əsasən, mövcud pandemiya şəraiti ilə əlaqədar olaraq, növbəti həftədən etibarən tədrisin təşkili ilə bağlı yeni normaların tətbiqi planlaşdırılır. Belə ki, aprelin 5-dən Bakı, Sumqayıt, Gəncə, Şəki şəhərləri və Abşeron rayonunun ümumi təhsil müəssisələrində tədris və təlim-tərbiyə prosesinin distant (məsafədən) formada təşkili nəzərdə tutulur. Digər şəhər və rayonlarda isə tədris sanitar-gigiyenik tələblərə əməl edilməklə qismən əyani formada davam etdiriləcək.