“Onların borcudur, xalqın pulunu yeyiblər...“

Tarix: 19 May 2021 16:20

"Müharibə vaxtı bir-iki "ağıllı" çıxdı dedi ki, niyə müğənnilər yardım etmir? Onların borcudur, xalqın pulunu yeyiblər. Bundan sonra xalq sənətçilərin üstünə getdi..."

Sonxeber.net xəbər verir ki, bu sözləri yenisabah.az-a "Pişik" ləqəbi ilə tanınan müğənni Günel Ələkbərova deyib.

İfaçı bəzi müğənnilərin qəsdli şəkildə həmkarlarını insanların gözündən salmağa çalışdığını bildirib:

"Bəzən insanların biz müğənniləri bu qədər qınamasına özümüz şərait yaradırıq. Necə ki, müharibə dövründə bunu öz içimizdəkilər etdi. Yadınızdadırsa, bir-iki dənə "ağıllı" çıxdı dedi ki, "Niyə müğənnilər yardım etmir? Onların borcudur, xalqın pulunu yeyiblər, indi də kömək etsinlər". Bundan sonra camaat başladı müğənnilərin üzərinə getməyə, çünki onlarda qıcıq yaratmışdılar. Müğənnilər beşini edib, birini edə bilməyəndə başladılar qarğışlar yağdırmağa. Sanki müğənnilər başqa planetdən gəliblər. Onlar da sizin kimi insandır, eyni havanı uduruq, hər şey eynidir. Bəzən belə provakasiyalar olur, müğənnilərə qarşı fikirlər səsləndirirlər, camaatda onlara qarşı nifrət yaradırlar. Bunu öz həmkarlarımız edir. Bəzi müğənnilər guya öz aləmlərində provakasiya edirlər, bu düzgün deyil. İnsanlarda sənətçilərə qarşı qıcıq yaratmaq olmaz".