“Azərbaycanda hətta kitab da oxuyurduq” - Qaytarılan erməni

Tarix: 25 Iyun 2021 12:54

Ermənistana qaytarılan erməni Erik Xaçatryan "armlur.am" saytına müsahibə verib. O, açıqlamasında Azərbaycanda olarkən ona normal münasibət göstərildiyini bildirib.

Sonxeber.net qafqazinfo-ya istinadən xəbər verir ki, Xaçatryan əsir düşməzdən əvvəl Hadrutda 43 gün mühasirədə qaldığını bildirib.

"43 gün gizləndik. Evin damında idik, yuxarı qalxıb bizi gördülər. Bizi əsir götürdülər və dərhal Bakıya apardılar", - deyə o qeyd edib.

Erməni Azərbaycanda ona normal münasibət göstərildiyini, hətta dostu ilə birlikdə kitab oxuduğunu bildirib: "Gündə üç dəfə yemək verirdilər. Həftədə bir dəfə yuyunurduq. Hər şey normal idi. Narahat etmirdilər".

Xaçatryan ona ölkəsinə qayıdacağı barədə 12 iyunda məlumat verildiyini və onunla həbsxanada olan bütün ermənilərin Ermənistana qaytarıldığını deyib.