Premyer Liqa klubunda yeni baş məşqçi

Tarix: 4 Iyul 2021 22:32

İngiltərənin "Kristal Pelas" klubunun yeni baş məşqçisi müəyyənləşib. Sonxeber.net matc.az-a istinadən bildirir ki, Premyer Liqa təmsilçisini bundan sonra Patrik Vieyra çalışdıracaq. 

Bu barədə klubun rəsmi saytı məlumat yayıb. 45 yaşlı fransız məşqçi ilə 3 illik müqavilə imzalanıb.
 
Qeyd edək ki, "Kristal Pelas" geridə qalan mövsümü Roy Hocsonun rəhbərliyi altında 14-cü pillədə başa vurub. Təcrübəli mütəxəssis mövsüm bitən kimi postundan ayrılmışdı.
 
Patrik Vieyra Fransa yığmasının heyətində dünya və Avropa çempionu olub, London "Arsenal"ı ilə 3 dəfə İngiltərə çempionu adını qazanıb. O, futbolçu karyerası dönəmində "Arsenal"la yanaşı, "Milan", "Yuventus", "İnter", "Mançester Siti" kimi klubların da formasını geyinib. Baş məşqçi kimi isə o, ABŞ-ın "Nyu York Siti", Fransanın "Nitsa" klublarına rəhbərlik edib.