Doğum günündə onun adını daşıyan bulağın açılışı olub - VİDEO

Tarix: 9 Avqust 2021 12:52

Şəhid olmamışdan öncə qızı Nazlını telefonunu açan hər kəsə əmanət edən, baş çavuş Hüseyn Tağıyev...

Sonxeber.net xezerxeber.az-a istinadən bildirir ki, ailəsi dünən onun 30 yaşını şəkillərlə və qoyub getdiyi  xatirələrlə  keçirib.

Ətrafında olan hər əsgərin problemini öz problemi bilən Hüseyn, uzun müddət daxili qoşunlarda vətənə xidmət edib. "Torpaqlarımızı azad edib geri qayıdacam, hər azad olunmuş torpaqda qızımı gəzdirəcəm. Tarix yazan igidləri ona tanıdacam" desə də, bu gün o arzunu həyat yoldaşı Ayşən xanım yerinə yetirmək niyyətindədir.

Kəşfiyyatçı kimi xidmət göstərən Hüseyn sentyabrın 24-ü Füzuli istiqamətinə yola düşüb.  Oktyabrın 5-i Füzuli rayon Alxanbəyli kəndinə atılan minamyot nəticəsində 11 kəşfiyyatçı dostu ilə birgə şəhid olub.  Anası  Mətanət xanım deyir ki, həmişə əsgərləri qoruyan oğlunun bir gün şəhid olacağı heç vaxt ağlına gəlməyib. Lakin o bu gün öz oğlunun mərdliyi və qazandığı adla  fəxr edir.

O, vətənpərvər ruhunu ətrafındakılara aşılamaqdan da heç vaxt çəkinməyib.

Bu gün o, şəhidlik hər kəsə qismət olmur dediyi ali vəzifəyə çatıb. Ölümündən sonra "Vətən uğrunda" və "Füzulinin azad olunmasına görə" medalları  ilə  təltif edilib. Bu gün həmçinin şəhidin adına Şuşa şəhərciyində bulağın açılışı olub.

Mövzu ilə bağlı daha ətraflı videomaterialı təqdim edirik: