Ağır yol qəzalarının sayı artır - Səbəb nədir? - VİDEO

Tarix: 5 Noyabr 2021 14:34

Aparılan araşdırmalar göstərir ki, son vaxtlar yol qəzalarının bir hissəsi sürücülərin sükan arxasında yuxlaması nəticəsində baş verir. Xüsusən də yuxulu sürücülərin törətdiyi yol- nəqliyyat hadisələri ölümlə nəticələnir.

Sonxeber.net Xəzər TV-yə istinadən xəbər verir ki, bu fikirləri Baş Dövlət Yol Polisi İdarəsinin inspektoru Toğrul Nəsirli deyib.

O bildirib ki, iki gün əvvəl paytaxtın Qaradağ rayonunda iki nəfərin ölümü, 1 nəfərin yaralanması ilə nəticələnən avtoqəza baş verib. Onun sözlərinə görə, saat 04:30 radələrində Seymur Abıyevin idarə etdiyi avtomobil paytaxt istiqamətində hərəkətdə olan Mehman Güləliyevin idarə etdiyi yük avtomobili ilə toqquşub. İlkin məlumata görə, qəzaya səbəb sürücünün sükan arxasında yuxulaması olub.

Qeyd edək ki, sürücülər də belə halların baş verdiyini təsdiq edirlər. Təcrübəli sürücülər avtomobil idarə etməyə yeni başlayan həmkarlarına diqqətli olmalarını və mümkün qədər yorğun və yuxulu halda sükan arxasında əyləşməməyi tövsiyə edirlər.

Yol polisi mümkün qədər hər 2-3 saatlıq fasiləsiz hərəkətdən sonra qısa müddətə də olsa sürücülərə avtomobilini saxlayıb dincəlməyi tövsiyə edir.

Mövzu ilə bağlı daha ətraflı videomaterialı təqdim edirik: