''Püşkü ''Qarabağ'' üçün uğurlu saymaq olar'' - Ailton Silva

Tarix: 2 Sentyabr 2019 10:20

"Qarabağ"ın braziliyalı müdafiəçisi Ailton Silva Azərbaycan Premyer Liqasının III turunda səfərdə "Səbail"ə 4:0 hesabı ilə qalib gəldikləri oyundan sonra jurnalistlərin suallarını cavablandırıb.

- Belə asan qələbə gözləyirdiniz?

- Bilirdik ki, rəqib yaxşı formadadır, uğurlu dönəmi idi. Meydana çıxaraq istədiyimizi reallaşdırmağa çalışdıq. Qollar da gəldi.

- Hazırda milli komandaların oyunlarına görə iki həftəlik fasilə yaranır. "Qarabağ" da yaxşı formadadır, oyununu tapıb, qələbələri sıralayır. Belə olan halda, fasilə komandanıza mənfi təsir göstərməz ki?

- Yox. Əksinə, daha müsbət təsir edəcək. Fasilə yaranacaq, daha çox işləyəcəyik. Çalışmağa kifayət qədər vaxt olacaq. Çünki 2-3 gündən bri oyunlarımız olurdu. Bu üzdən çox işləməyə vaxt olmur.

- Avropa Liqasının qrup mərhələsinin püşkünü necə dəyərləndirərdin? "Qarabağ" qrupdan çıxmalıdırmı?

- Birincisi, yaxşı komandamız var. İlk növbədə bu, qeyd olunmalıdır. Püşkü də hardasa uğurlu saymaq olar. Sadəcə, hər şey istədiyimiz kimi olsa, ümid edirəm ki, qrupdan çıxa bilərik.

- "Qarabağ" Premyer Liqada çempionluğa əsas rəqib kimi  "Neftçi"ni görür?

- Hər hansı rəqib haqda danışmaq istəməzdim. Yaxşı olar ki, öz komandamız haqda danışaq. Qələbələri sıralayıb hədəflərimizə doğru gedəcəyik. (Report)