Bakıda bədii gimnastika üzrə 37-ci Dünya Çempionatının qrup hərəkətlərində qalibləri və mükafatçıları mükafatlandırılıb

Tarix: 22 Sentyabr 2019 17:12

Bakı. Cani Babayeva - Trend:

Bu gün Bakıda Milli Gimnastika Arenasında bədii gimnastika üzrə 37-ci Dünya Çempionatının qrup hərəkətlərində qalibləri və mükafatçıları mükafatlandırılıb.

Trend-in məlumatına görə, 5 topla hərəkətlərdə birinci yeri Yaponiya komandası, ikinci yeri Bolqarıstan komandası, üçüncü yeri isə Rusiya komandası tutublar.

Mükafatları Beynəlxalq Gimnastika Federasiyasının (FİG) Apelyasiya Heyətinin üzvü Ron Qalimor, FİG-in Texniki Komitəsinin üzvü Karolina Hant, Milli Gimnastika Arenasının direktoru Maqsud Fərzullayev təqdim ediblər.

3 halqa və 2 cüt gürz ilə hərəkətlərdə birinci yeri Rusiya komandası, ikinci yeri Yaponiya komandası, üçüncü yeri isə İtaliya komandası tutublar.

Qaliblərə və mükafatçılara mükafatları Beynəlxalq Gimnastika Federasiyasının prezidenti Morinari Vatanabe, Azərbaycanın bədii gimnastika üzrə yığmasının baş məşqçisi Mariana Vasileva, bədii gimnastika üzrə 37-ci Dünya Çempionatının səfiri Yana Batırşina təqdim ediblər.

Qeyd edək ki, Milli Gimnastika Arenasında keçirilən dünya çempionatı sentyabrın 16-da başlayıb və sentyabrın 22-dək davam edəcək. 61 ölkədən 300-dən artıq gimnast, çempionatda 9 dəst medal uğrunda mübarizə aparacaq.

Bakıda keçirilən möhtəşəm dünya çempionatının şüarı: "Nağıllar həyatda gerçəkləşəcək"dir ("Fairy Tales will come to life").

Trend-in ən mühüm və maraqlı xəbərlərini "Telegram"da izləyin