“Qarabağ” – “Viktoriya” matçından gözləntilər - “Tapdalayıb keçəcəklər…”

Tarix: 17 Avqust 2022 12:16

Bu gün UEFA Çempionlar Liqasının pley-off mərhələsində mübarizə aparan "Qarabağ" klubu Çexiyanın "Viktoriya" komandası ilə ilk oyununa çıxacaq. Görüş doğma meydanda - Tofiq Bəhramov adına Respublika stadionunda baş tutacaq.

Ölkəmizi dünyanın nüfuzlu futbol turnirində təmsil edən Ağdam komandasının oyununa maraq böyükdür. Azərbaycanda futbol həvəskarları həyəcanla matçın başlanmasını gözləyir, Qurban Qurbanovun baş məşqçisi olduğu "Qarabağ"ın qələbə qazanacağına inanırlar. 

Sonxeber.net xəbər verir ki, modern.az bir neçə deputat və idman jurnalisti arasında sorğu keçirərək, onların bugünkü görüşlə bağlı proqnozlarını öyrənib.

Deputat Aqil Abbas: "Qarabağ" klubu "Viktoriya"nı tapdalayıb keçəcək. Buna əminəm. Siz də qəti narahat olmayın".

Deputat Fazil Mustafa: "Qarabağ"ın səviyyəli oyun göstərəcəyinə, Azərbaycanı sevindirəcəyinə inanıram. Amma iki hissəli olan bu matçlarda hesabın indidən necə olacağını deyə bilmərəm. Çünki burada taktiki tapşırıqlar, şans da önəmlidir, amma mən şansın "Qarabağ"dan yana olacağına inanıram. "Qarabağ" "Viktoriya"dan daha güclü komandadır".

İdman jurnalisti Ceyhun Rzayev: "Mən "Qarabağ" klubunu illərdir yaxından izləyirəm. Deyə bilərəm ki, bugünkü "Qarabağ" tarixin ən güclü "Qarabağ"ıdır. Komandamızı Çempionlar Liqasının qrup mərhələsində görürəm. Amma çətin olacaq. "Viktoriya" çox yaxşı müdafiə olunan, standart vəziyyət və əks-hücumlarda təhlükəli komandadır. Ola bilsin ki, hətta Bakıda qələbə qazanmayaq. Qurban Qurbanov ilk oyunda rəqibi daha yaxından tanıyır və cavab oyununda komandası daha yaxşı çıxış edir".

Teleaparıcı Sənan Şəfiyev: "Məncə, "Qarabağ"ı ciddi sınaq gözləyir. Çexiya klubu uğurlu rəqib sayılmır. Fikrimcə, məhsuldar oyun izləyəcəyik. Ağdam təmsilçisinin qələbə qazanacağına inanıram. Hazırkı mövsüm "Qarabağ"ın tarixində ən güclü heyət olduğunu düşünürəm. Tribunalar komandaya əlavə güc verəcək. "Qarabağ" klubu Çempionlar Liqasına rəng qatacaq. Komandamıza uğurlar arzulayıram".