Əli Kərimli çaşdı - ''hamı pastelini hazırlasın'' - FOTOFAKT

Tarix: 9 Yanvar 2023 17:36

Deyir, dil çaşıb sözün düzünü deyər. Lakin bu çaşmaq deyəsən, bu dəfə AXCP sədri Əli Kərimliyə baha başa gəlib. Yazıb sildiyi status AXCP sədrini növbəti dəfə sosial şəbəkələrin "qəhrəmanına" çevirib. Növbəti dəfə özünü biabır edən AXCP sədri hardan bilərdi ki, kompüter və yaxud ola bilsin telefonda yazdığı status onu bir anın içində "ulduz"a çevirəcək.

Sonxeber.net xəbər verir ki, Əli Kərimli tərəfdarlarına tapşırıq kimi verəcəyi məlumatı səhvən özünün facebook səhifəsində paylaşıb. Maraqlıdır ki, tərəfdarları da dərhal müvafiq tapşırığı gözləmədən onu yayıblar. Əli Kərimli də ardınca onlara bu statusu silməyi tapşıranda artıq iş-işdən keçib. Sosial şəbəkələrdə bu status ildırım sürəti ilə yayılıb və ciddi rezonans doğurub. Bəs AXCP sədrinin qalmaqallı statusunda nə var? AXCP sədrinin statusunu olduğu kimi təqdim edirik:

"Mən Maya xanımın yanına ona görə getmədim ki, cəbhəçilərin aclığı başlasın və mən gedib ondan xahiş edim ki, aclığı dayandırsın. Yəni mənim gedib deməyə sözüm olmalıdır. Aclığı başlamağı sürətləndirin. İndidən istilik peçi qurun. Hesabı özümüz ödəyəcəyik. Qorxmasınlar. Təcili hamı pastelini hazırlasın. 5-də - 6-da aclıq başlansın artıq. Mən bu gün 5-də Toplum tv-də olacam. Oradan çıxıb, gedəcəm Tofiq bəygilə.
Təqribən 18:30 - 19:00 arası Tofiq bəygildə olacam. Saqif bəygil o saatlarda getsinlər Tofiq bəygilə. Mən orada tək olmayım. Səadət xanımı və başqa getmək istəyənləri də götürüsünlər. Yəni mən gələnə orada 5-6 nəfər RH üzvü olsun. Təzəxan bəy də olsun. Çalışarıq ki, Maya xanıma aclığı bu gün dayandıraq". 

Sosial şəbəkələrdə gedən müzakirələrdə AXCP tərəfdarları liderlərinin müdafiə etməyə söz də tapa bilməyib, bunun sadəcə texniki bir səhv olduğunu israr etməyə çalışıblar. Bəli, növbəti dəfə liderləri onları çıxılmaz duruma salıb. Çox güman ki, bundan sonra ətrafında qalan bir qrup insan da ondan üz döndərməli olacaq. Anlayacaqlar ki, bu cür təfəkkür sahibi olan şəxsdənnə qədər tez imtina etsələr bir o qədər yaxşı olar. Bu ağılda, düşüncədə olan şəxs ölkəyə, xalqa rəhbərlik edə bilməz. 

Maraqlı olan həm də odur ki, başqa vaxtlarda dərhal istənilən bir məsələyə ildırım sürəti ilə cavab verən AXCP sədri hələ də onu "məşhur" edən səhvinə aydınlıq gətirə bilməyib. AXCP sədrinin xüsusən də "təcili hamı pastelini hazırlasın" sözləri sosial şəbəkələrdə gülüş və tənqidlərə tuş gəlib. Qeyd edək ki, AXCP sədrinin bu çaşması böyük narazılıqla qarşılanmaqla yanaşı, sosial şəbəkələrdə onu ikiüzlülükdə ittiham edənlər də çox olub.

Kamran Seyidov