Onlar komediya deyil, lağlağıdır, adi rol oynayanlar “mənəm-mənəmlik” edir”- FOTO

Tarix: 6 Mart 2024 18:30

"Müasir mədəniyyətimizdən bu gün danışmaq qəliz məsələdir. Bu mənim şəxsi fikrimdir. Müqayisə olunmaz dərəcədə fərq var. Müasir dövrün bəlkə də özünə görə başqa tələbləri var, amma hərhalda nə televiziya tamaşaları, nə də filmlərimiz o dövrdəki kimi deyil. Heç biri yadda qalmır" 
 
Milli.Az bildirir ki, bunu moderator.az-a açıqlamasında xalq artisti Yaşar Nurinin həyat yoldaşı Rəhimə Nuriyeva deyib. O daha sonra əlavə edib.

"Həmin filmlərə bir dəfə baxan kimi yaddan çıxır. Bilmirəm, niyə bu günə düşdü kinomuz, incəsənətimiz?! Çox təəssüflənirəm! Necə ki, qardaş Türkiyədə tarixi filmlər var, mən də istərdim ki, bizim tarixi qəhrəmanlarımız haqda da o cür filmlər çəkilsin. Mən televizoru açanda həmin filmləri izləmək istəyirəm! Hansı köhnə filmi izləyirsən, insanda hər dəfə yeni fikir yaradır. Bu günki filmlərin mövzuları nələrdir? Nə qədər kriminal, məişət mövzularında film, serial çəkmək olar?! Tərbiyəvi mövzuda o qədər filmlərimiz var idi ki. Necə gözəl idi! Dəyərlərimizi filmlər qorumalıdır, yaşatmalıdır. Dünən nəhayət ki, kinoittifaqlar birləşdi! Fərqi yoxdur sədr kimdir, amma istərdim işi elə aparsınlar ki, mədəniyyətimizi irəli çəksinlər. Kinonu, teatrı yaşatsınlar. Hələ ki, nə Teatr Xadimləri İttifaqının, nə də Kinoittifaqın bir işinə şahid olmamışam" deyə sənətkarın xanımı bildirib.

O daha sonra gənc nəsil aktyorlardan danışıb.

"Yaşlı nəslin oyun tərzi yaxşıdır, amma gənclərin əksəriyyətindən baş açmaq olmur. Sözün düzü onların adlarını bilmirəm, bildiklərim də yadımdan çıxır. Aralarında 3-4-ü var ki, güclü saya bilərəm, amma onları filmlərdə yox, teatr tamaşalarında görmək istərdim. Yaxşı aktyoru ssenari və rejissor üzə çıxarır. İndi daha çox komediya filmlərinə üstünlük verirlər. O lağlağıdır, adını sadəcə komediya qoyublar. Kim özünü əsl aktyor kimi sınamaq və görmək istəyirsə, gedib teatrda 3 saat canlı tamaşa oynasın. Görsün ki, aktyor nədir?! Aktyor necə olurlar! Siyavuş, Hacıbaba, Yaşar, Fuad, Səməndərə heç kim çata bilməz!. Mən belə düşünürəm. Onların oynadığı rolların sayı-hesabı yoxdur. Gəlin indi indikilərə baxaq, görək onlar nə oynayıblar?! Bu insanlar zirvədir! Zirvəyə qalxmaq üçün sənətkar olmaq lazımdır. Adi rol oynayan "mənəm-mənəmlik" etməməlidir" deyə Rəhimə xanım deyib.

Milli.Az