Vardanyan İran və Rusiya arasında ''bənd'' idi - Kedar

Tarix: 5 Iyun 2024 21:12

Ruben Vardanyan Ermənistan siyasətində sərt xətt tərəfdarıdır və ölkəsi ilə Azərbaycan arasında sülh prosesinin əleyhinədir. Həbsdə saxlanılan bu şəxs təkcə terrorizmi maliyyələşdirməkdə və beynəlxalq sərhədləri qanunsuz keçməkdə deyil, həm də mütəmadi şəkildə Azərbaycana qarşı zorakılığın təbliği ilə sülh prosesinə təxribat etməkdə ittiham olunur.

Sonxeber.net axar.az-a istinadən xəbər verir ki, bu barədə İsrailin tanınmış eksperti, sabiq polkovnik-leytenantı, şərqşünaslıq elmləri üzrə professor, Begin-Sadat Strateji Araşdırmalar Mərkəzinin tədqiqatçısı doktor Mordexay Kedar "Yerusəlim Post" qəzetində dərc olunmuş "Rəisinin ölümü Azərbaycan və Ermənistan münasibətlərinə necə təsir edəcək" sərlövhəli məqaləsində yazıb.

Qeyd olunub ki, bu yaxınlarda helikopter qəzasında həlak olmuş İran Prezidenti Rəisinin ölümü və erməni separatçısı Vardanyanın siyasi arenadan getməsindən sonra İranda siyasi proseslər fərqli istiqamətdə cərəyan edəcəyi təqdirdə Ermənistanla Azərbaycan arasında münasibətlərin nizamlanması ehtimalı istisna olunmur. Müəllif həmçinin iranlıların erməni kilsəsindən erməni dini və milli hisslərini qızışdırmaq və Qarabağın tamamilə ilhaqı çağırışlarını gücləndirmək üçün istifadə etdiyinə dair şübhələrini də ortaya qoyur. Onun fikrincə, kilsə açıq şəkildə Ermənistan hökumətinin qərarlarına qarşı çıxır və müxalifətçi qismində hərəkət edir.

Diqqətə çatdırılıb ki, Qarabağdakı keçmiş separatçı rejimin dövlət naziri vəzifəsini tutmaqla yanaşı, erməni terror qruplarının maliyyələşdirilməsində böyük pay sahibi olmuş Ruben Vardanyan indiki hakimiyyətə qarşı çıxır. Müharibədən sonra Qərbin sanksiyalarından yayınmaq və sərvətini xilas etmək niyyəti ilə Rusiyadan qaçan Vardanyan iranlılarla ruslar arasında əlaqə yaradan vacib bənd olub.

Məqaləni ətraflı şəkildə bu linkdən oxumaq mümkündür.