''Gürcüstanda olan bir sıra dövlət rəsmiləri Qərbə meyllidir'' - RƏY

Tarix: 15 Oktyabr 2024 11:33

Hazırda Gürcüstanda daxili vəziyyət mürəkkəbdir və hakimiyyətə Qərbin təzyiqi hiss edilir.

Bunu əslən Gürcüstandan olan azərbaycanlı, Bakı Dövlət Universitetinin (BDU) Beynəlxalq Jurnalistika və informasiya siyasəti kafedrasının professoru Həmid Vəliyev report.az-a açıqlamasında oktyabrın 26-da Gürcüstanda keçiriləcək parlament seçkilərinə münasibət bildirərkən deyib.

Onun sözlərinə görə, bu vaxta qədər bəzi Gürcüstan liderləri həmişə Qərbə meyl edib:

"Mən Gürcüstan SSR-nin əməkdar jurnalisti olaraq Gürcüstanın mənəviyyatını, ədəbiyyatını və etnoqrafiyasını yaxşı bilirəm. Şübhəsiz ki, Gürcüstan hakimiyyətinə qərb təzyiq göstərməyə çalışır və bu aydın şəkildə hiss edilir. Ölkənin bu günə qədər olan bir sıra dövlət rəsmiləri də Qərbə meyl edib və onların təzyiqini müəyyən mənada qəbul edib".

Professor həmin qüvvələrin öz aralarında da bəzi fikir ayrılıqları yaşadığını bildirilib:

"Gürcüstan vətəndaşlarının arasında qərbpərəst qüvvələr qədər Rusiya ilə münasibətləri yenidən qurmağa çalışanlar da az deyil".

Qeyd edək ki, Qərbin Gürcüstanda oktyabrın 26-da keçiriləcək parlament seçkilərində prosesə müdaxilə edəcəyinə dair iddialar var.