YARAT Mərkəzində “Özüm ilə təklikdə” adlı plastik tamaşa göstərildi - FOTO

Tarix: 9 Dekabr 2024 17:18

YARAT Mərkəzində "Praktika" Teatrının YARAT təşkilatı ilə əməkdaşlığı çərçivəsində müasir üslubda hazırlanan "Özüm ilə təklikdə" adlı plastik tamaşa göstərildi.

Tamaşa, İosif Brodskinin yaradıcılığından  ilhamlanan, "Praktika" Teatrının rezidenti Jack's Garret komandasının 2022/2023 mövsümündəki bədii fəaliyyətinin nəticəsidir.

Daxili münaqişədən bəhs edən "Özüm ilə təklikdə" tamaşası küçə rəqsi (street dance) və müasir xoreoqrafiya texnikalarını birləşdirərək, hərəkətlərin gücü ilə poeziyanın dərinliyini bir araya gətirir.

Baş qəhrəman yol ayrıcındadır: mübarizə aparmaq, ya da özünü qəbul etmək, işığa doğru irəliləmək, ya da qaranlığa dalmaq.

Aktyorlar Aleksandr Tronov və Aleksandr Alyoxin Brodskinin şeirlərini yenidən mənalandıraraq, tamaşaçını metaforalar və simvollar aləminə qərq etdilər, burada hər bir seçim önəmlidir.

Səhnəqrafiya, kostyumlar və ideyası xoreoqraflar Anna Deltsova və Aleksandr Tronova məxsus tamaşaya 150-ə yaxın qonaq qatılmışdır.

Tamaşadan 1 gün sonra isə YARAT və "Praktika" Teatrının əməkdaşlığının davamı olaraq Jack's Garret komandası tərəfindən müasir xoreoqrafiya üzrə ustad dərsi keçirildi. Rusiyalı xoreoqraf və aktyor Aleksandr Tronovun rəhbərliyi ilə ikihissəli təlimə qatılan iştirakçılar küçə rəqsi texnikalarını və hərəkətlərlə emosiyaların necə çatdırılacağını öyrəndilər.

"Praktika" Teatrı - Moskvada yerləşən, dövrün tendensiyalarına cavab verən və fəaliyyətində çağdaş ədəbiyyatından istifadə edən eksperimental mərkəzdir. "Praktika" tamaşaçılarla müasir yazılar, musiqi, dizayn, memarlıq, multimedia və aktyor oyununun aktual bədii dili ilə danışır. Teatr, bugünkü incəsənəti yaradan fənlərarası sahəni araşdırır. Teatrın rezidentləri arasında "Brusnikina Emalatxanası", Yuri Makarovun "Teatr vkusa", "Eskizı v prostranstve" müəllif teatrı, habelə Aleksandr Tronov və Anna Deltsova simalarında küçə və eksperimental rəqs komandası Jack's Garret var.