''Burada heç kim yekəxanalıq etməli deyil'' - Deputat

Tarix: 28 Yanvar 2025 20:14

Son günlər dəbdəbəli yas mərasimlərinin ləğv olunması ilə bağlı müzakirələr gedir. Bir sıra rayonlarda belə mərasimlərin sadələşdiyi, yemək verilməsinin yığışdırıldığı da qeyd olunur. 

Ümumiyyətlə, yas mərasimlərinin keçirilməsi ilə bağlı qanunvericiliyə hansısa dəyişiklik edilməsi mümkündürmü?

Milli Məclisin İctimai birliklər və dini qurumlar komitəsinin sədri, deputat Fazil Mustafa "Unikal"a açıqlamasında bildirib ki, bu cür mərasimlərin qanunla tənzimlənməsi məsələsində sıxıntılar ortaya çıxır.  Onun sözlərinə görə, bu, insanların mədəni zövqləri ilə bağlı məsələdir:

"Məsələn, kimsə doğum gününü sərbəst, rahat keçirmək istəyir, digəri fişəng atmaq və ya böyük tort hazırlatmaq istəyir. Buna necə qarışasan? İnsanların israfçılıqdan uzaq olması üçün aparılan təbliğatların elə də önəmi olmur. Kim bir az imkan tapırsa, daha çox özünü göstərməyə çalışır. Ona görə bu məsələlər çətin qanunla tənzimlənsin. Cəmiyyətin özünün bunu vərdişə çevirməsi, yas mərasimlərində yeməyin yığışdırılması, yas məclislərinin sadələşdirilməsi hamının marağına uyğun olan məsələ kimi qəbul olunmalıdır. Burada heç kim yekəxanalıq etməli deyil və çalışmalıdır ki, bu kimi prosesləri normal səviyyədə tənzimləmək mümkün olsun. İnsanlara böyük yük düşməsin. Çətinlik buradan qaynaqlanır. 

Bu, cəmiyyətin özünün mədəni problemidir. Bunu çözə bilməsə, yüz qanunda çıxarsan, insanın şəxsi həyatına, özünün yaşam tərzinə qarışmaq mümkün olmur. Deyəcək ki, mən məclisi bu cür keçirirəm, belə fikirləşirəm, öz pulumdu belə xərcləyirəm, sizə nə dəxli? Bunu ümumi cəmiyyətin davranış prinsipləri olaraq həyata keçirsək, təbliğ edə bilsək, ayrı-ayrı bölgələr, kəndlər, şəhərlər, regionların özləri buna keçsələr, bu qədər sıxıntılar ortada qalmaz. İnsanlar rahatlıqla öz məclislərini yola verərlər".