''Qəbələ'' ilə müqavilə mənim üçün formal bir şeydir'' - Elmar Baxşıyev

Tarix: 23 Dekabr 2019 15:06

“Qəbələ”nin baş məşqçisi Elmar Baxşıyev ilin yekunlarına dair Qol.az-a müsahibə verib.

- 2019-cu ili “Qəbələ” üçün necə qiymətləndirirsiniz?

- Mövsümə klub olaraq çətinliklərlə başladıq. Bilirsiniz ki, müəyyən enişlər oldu, ona görə də bir çox futbolçu komandanı tərk etdi. Onların yerinə gələn akademiyamızın futbolçularına öz oyunlarını tapmaları və komandaya faydalı olmaları üçün müəyyən vaxt lazım idi. Ümumi götürəndə komanda son oyunlarda nəsə edirdi. 

- Klubda baş məşqçi təyinatınız rəsmiləşdi. Bu komandadakı işinizə necə təsir edəcək? Növbəti il azarkeşlər fərqli “Qəbələ” görə biləcək? Komanda olaraq qarşınıza hansı hədəfləri qoymusunuz?

- Məşqçi olaraq təsdiqlənməyim bu baxımdan heç bir əhəmiyyət daşımır. Bu klubda məşqçi kimi başlamışam və məşqçi olaraq da püxtələşirəm. Mənimçün heç bir əhəmiyyəti yoxdur, formal bir şeydir.  Növbəti il komanda şəklində meydanda daha yaxşısını etməyə çalışacağıq.

- Azərbaycan kubokunun yarımfinalına vəsiqə qazandınız. Ötənilki uğurunuzu təkrarlamaq - titul qazanmaq üçün iki rəqibi keçmək kifayətdir. Kubokda şanslarınızı necə qiymətləndirirsiniz?

- Yarımfinal oyunlarına hələ çox var, gəlin tələsməyək. Əsas komandanın bəzi mövqelərini gücləndirmək lazımdır. Sırf bu barədə düşünürük. Hazırda inandırım sizi, kubok barədə ağlımızdan heç nə keçirmirik. Kubok 2 oyundan ibarətdir. Çalışmaq lazımdır ki, oradakı uğuru çempionata da gətirək.

- Qış fasiləsində komandanın heyətində dəyişiklik gözlənilir? Yoxsa mövcud heyətlə davam etməyi düşünürsünüz?

- Bildiyiniz kimi, David Volkov komandanı tərk etdi. O, bizimçün aparıcı oyunçu idi. Əlbəttə ki, qalmağını istərdim, son oyunlar komandaya çox faydası dəyirdi. Amma futbolda əbədi heç nə yoxdur, onun getməsini normal qarşılamalı və sadəcə, yerini doldurmalıyıq. Ümid edirəm ki, onun yerini doldura bilən layiqli oyunçu tapacağıq.

- Volkovun gedişi “Qəbələ”nin hücum xəttini zəiflədəcək?

- Onun getməsini istəməzdik. Yenə deyirəm, futbolda əbədi heç nə yoxdur. Yəqin ona yaxşı şərtlər təklif ediblər. Bu da normaldır. Hər bir futbolçu təklif gözləyir. Volkovun bunu layiqincə dəyərləndirməyi normaldır.

- Klub hansısa legioner ilə danışıqlar aparır?

- Bu işlərlə klubun meneceri məşğul olur. Bu yöndə işlər gedir. Konkret məlumat olanda açıqlayacağıq.

- Heyətdə müqaviləsi bu qış başa çatan futbolçular var?

- Bu qış müqaviləsi başa çatanlardan biri David Volkov idi. Digəri  İviça Juniçdir. Juniçlə ilkin razılıq əldə olunub. Ümid edirik ki, o, komandada qalacaq və öz faydasını verəcək.

- Təlim-məşq toplanışını harada keçirivəksiniz? Toplanışda qarşılaşacağınız rəqiblər məlumdur?

- Təlim-məşq toplanışını Antalyada keçirəcəyik. Yanvarın 12-si Antalyaya yollanacağıq. Rəqiblərlə bağlı klub nümayəndələri danışıqlar aparır. Qarşıdakı 1-2 gündə bütün rəqiblər məlum olacaq.

- Futbol mütəxəssisləri millimizdə boş qalan baş məşqçi vəzifəsinə yerli məşqçinin gətirilməli olduğunu qeyd edirlər. Siz necə düşünürsünüz?

- Fərqi yoxdur, yerli olacaq ya əcnəbi. Sadəcə olaraq, işini layiqincə yerinə yetirən və gələcək üçün millinin inkişafına nail olan adama ehtiyac var.

Azad NURİYEV