Bakı və Abşeronda şəhid ailələrinə baş çəkilib - FOTO

Tarix: 30 Dekabr 2019 18:50

Səfərbərlik və Hərbi Xidmətə Çağırış üzrə Dövlət Xidməti (SHXÇDX) tərəfindən Milli Qəhrəmanların, veteranların, QHT rəhbərlərinin, baş redaktorların, bir qrup ictimai xadimin iştirakı ilə 31 Dekabr - Dünya Azərbaycanlılarının Həmrəyliyi Günü və eləcə də Yeni il bayramı münasibətilə respublikanın bütün şəhər və rayonlarını əhatə etməklə bir qrup şəhid ailəsinə bayram təbrikləri və sovqatlar çatdırılıb.

Sonxeber.net Trend-ə istinadən xəbər verir ki, Səfərbərlik Hazırlığı və Səfərbərlik İdarəsinin rəisi polkovnik Şaiq Məmmədov, Səfərbərlik və Hərbi Xidmətə Çağırış üzrə Dövlət Xidmətinin Qaradağ rayonu idarəsinin rəisi polkovnik Vüqar Seyidov, Azərbaycan Respublikası Çernobl əlilləri ittifaqı ictimai birliyinin sədri Mirhəsən Həsənov və Trend Beynəlxalq İnformasiya Agentliyinin Baş direktorun müavini Arzu Nağıyev Qaradağ rayon Lökbatan qəsəbəsi və Abşeron rayonu Masazır qəsəbəsində yaşayan şəhid Elxan Həsənov və şəhid Zaur Həsənovun ailələrinin qonağı olub, onları bayram münasibətilə təbrik edib, gündəlik qayğıları ilə maraqlanıblar.

Şəhid ailələrinə ərzaq yardımı edilib və görüşdə bildirilib ki, respublikamızın müstəqilliyi və vətən qarşısında borcunu qəhrəmanlıqla yerinə yetirərək şəhid olmuş övladların xatirəsi xalqımız tərəfindən daim əziz tutulur. Şəhid ailələri daim Prezident İlah Əliyevin diqqət mərkəzindədir. Qarabağ müharibəsi əlilləri və şəhid ailələri dövlətimizin hərtərəfli diqqət və qayğısı ilə əhatə olunur.