Bakıda narkotik maddənin təsiri altında olan kişi qaçırdığı avtomobili polis maşınına çırpdı

Tarix: 16 Aprel 2020 16:32

Bakının Nəsimi rayonunda narkotik maddənin təsiri altında olan şəxsin cinayət əməli nəticəsində polis əməkdaşları xəsarət alıb.

Sonxeber.net xəbər verir ki, bu barədə Oxu.Az-a hüquq-mühafizə orqanlarından məlumat verilib.

Aprelin 15-də, saat 00:45 radələrində Şamil Əzizbəyov və Səməd Vurğun küçələrinin kəsişməsində 1991-ci il təvəllüdlü Gəncə şəhər sakini Şəhriyar Həsənov karantin rejimi qaydalarını "yoxlamaq" məqsədilə 1993-cü il təvəllüdlü Şərur rayon sakini Anar Rzayevə məxsus "Opel" markalı avtomobili qaçırıb.

Hadisədən 15 dəqiqə sonra Ş.Həsənov polislərin "dayan" əmrinə məhəl qoymayaraq, qaçırdığı avtomobili Şamil Əzizbəyov və Əlimərdan bəy Topçubaşov küçələrinin kəsişməsində Nərimanov rayonunun 18-ci Polis Bölməsinin əməkdaşlarının olduğu "Fiat" markalı avtomobilə çırpıb.

Nəticədə, polis serjantı İlkin Müzəffərli (1991-ci il təvəllüdlü), operator Mehman Əliyev (1997-ci il təvəllüdlü), baş əməliyyat müvəkkili Ruslan Səfərov (1980-ci il təvəllüdlü) və hüquq-mühafizə orqanları əməkdaşlarının sərxoşluq vəziyyətinin müəyyən edilməsi üçün tibbi müayinəyə apardıqları Kamal Mustafayev (1985-ci il təvəllüdlü) müxtəlif dərəcəli bədən xəsarətləri ilə 1 saylı Kliniki Tibbi Mərkəzə (Semaşko) müraciət ediblər.

Xoşbəxtlikdən, onların arasında ciddi xəsarət alan olmayıb.

Ş.Həsənov saxlanılıb. İlkin dindirmə zamanı o, cinayət əməlini törədərkən narkotik maddənin təsiri altında olduğunu etiraf edib.

Faktla bağlı araşdırma aparılır.