“Mən “Zirə”ni yaxşı başa düşürəm” – Ayxan Abbasov

Tarix: 20 Iyun 2020 09:32

"Sumqayıt"ın baş məşqçisi Ayxan Abbasovun Qol.az-a müsahibəsi

- AFFA-nın Premyer Liqanı erkən başa vurması qərarına münasibətiniz necədir?

- Biz bunu çoxdan deyirdik. Son dəfə karantin müddəti uzadılandan bəri əmi idik ki, davam etmək təhlükəlidir. PFL və AFFA sona qədər mübarizə apardı. Həmin qərardan sonra 2 həftə ərzində sərtləşmə olacaq. Görünür, bu gün ölkəmizdə həqiqətən böyük təhlükə var. İnsanların sağlamlığı hər şeydən önəmlidir. Ona görə də məncə, düzgün qərardır.  Düşünürəm ki, bu qərar komandanın növbəti mövsümə yaxşı hazırlaşması üçün səbəblərdən biri olacaq.

- “Sumqayıt" ilk dəfə Avropa Liqasına vəsiqə qazandı. Bu münasibətlə sizi təbrik edənlər çox oldu?

- Əlbəttə. İlklər daha maraqlı, həyəcanlı olur. Təbii ki, yaxınlarımız, dostlarımız təbrik etdi. Etiraf etmək lazımdır ki, həm "Sumqayıt", həm azarkeşlər, həm də şəhər illərlə bunun həsrətində idi. Futbolçular, rəhbərlik çox istəyirdi. Əlbəttə ki, sevinirik. Komanda ilk dəfə Avroliqaya vəsiqə qazanır. Mən inanıram ki, bu, "Sumqayıt"ın daha da irəliləməsinə təkan verəcək.

- Premyer Liqada mübarizə aparan klublarımızdan kimlər sizi təbrik etdi?

- Həm bir yerdə oynadığım futbolçuları- hansı ki, ikinci məşqçi işləyirlər, həm çalışdığım klubların rəhbərliyi və məşqçilərini, "Qarabağ"dan həm rəhbərlik, həm məşqçilər, "Neftçi"nin baş məşqçisi Füzuli Məmmədov və məşqçilər, "Səbail"i və sair qeyd edə bilərəm. Eləcə də bir çox jurnalist, işləməyən məşqçilər də var. Həqiqətən xoş oldu.

- Bəs, sabiq komandanız "Zirə"dən necə?

- Bəli. Keçmiş komandamın həm rəhbərliyi, həm də məşqçiləri təbrik etmişdi.

- "Zirə" iddia edir ki, ədalətsiz bölgüdür, xallar bərabər olduğu üçün biz də vəsiqə əldə edə bilərdik...

- Əlbəttə, iddiaları ola bilər. Biz buna heç nə deyə bilmərik. "Zirə" mənim üçün Azərbaycan çempionatında doğma klublardan biridir. Çünki mən bu klubda ilk dəfə baş məşqçi olaraq çalışmışam və orada Avroliqa həyəcanı yaşamışam. "Zirə"nin mənim üzərimdə əməyi danılmazdı. Amma bu gün rəqibik. Yəni, çempionatın əsasnaməsi var. Qərarlar da buna görə verilir. Xallar bərabər ola bilər, lakin bəzi qaydalar var. Bilirsiniz ki, Azərbaycan çempionatında hətta xallar bərabər olub və qızıl oyunlar keçirilib, hansısa bir komanda çempionluğunu və ya 2-ci, 3-cü yeri əldən verib. Bu, normaldır. Təbii ki, onlar da Avroliqada oynamaq istəyirdilər. Onları da yaxşı başa düşürəm. İnşallah, növbəti illərdə avrokuboklarda çıxış etmək bütün komandalarımıza nəsib olar.

- Bəs, Avropa Liqasına hazırlıqla bağlı planlarınız necədir? Nə fikirləşirsiniz?

- Müsbət məqam odur ki, turnirdə oynayacağımız gün bilinir. Bu, bizim üçün yaxşıdır. Ona görə ki, öz planlarımızı tərtib edə bilərik. Məni maraqlandıran digər bir məsələ Azərbaycan çempionatının nə vaxt başlamasıdır. Bilirik ki, Premyer Liqa Avropa Liqasından tez başlayarsa, biz əvvəlcə yerli çempionat üçün hazırlıq keçməliyik. Ona görə də yəqin ki, yaxın günlərdə bunların hamısı bəlli olar. Onsuz da 2 həftə sərt karantin rejimi olacaq. Həmin 2 həftədən sonra əlbəttə, planlarımızın hamısı tərtib olunacaq və bu 2 həftə ərzində yəqin ki, klubumuzda bütün suallarımıza cavab verilər. Ondan sonra iş başına keçə bilərik.

- Karantindən danışdıq. Operativ Qərargahın qərarı "Sumqayıt"a, ümumiyyətlə komandaların hazırlıq məsələsinə nə dərəcədə təsir edir?

- Onsuz da planımızda futbolçulara 2 həftəlik istirahət vermək var idi. Düzdür, çempionat olmayıb, mart ayından bəri istirahət edirlər. Amma oyunçularımızda psixoloji yorğunluq var idi. Havaların belə isti keçməsi də təsir edirdi. Ona görə də futbolçularıma 2 həftəlik istirahət vermək fikrim var idi. Ailələri ilə yaxın olsunlar və bundan sonra işimizə başlayaq. İnanıram ki, hər kəsə çətin olsa da, bu 2 həftə ərzində qaydalara riayət edəcəyik, pandemiyanın yayılması azalacaq.  Çünki bilirsiniz,  ölkəmiz sərt rejimi yumşaldandan sonra məsələyə laqeyd yanaşma oldu ki, bu gün yoluxma sayı belə çoxdur. Ona görə də mən inanıram ki, həmin müddət ərzində səbr edərək, 2 həftə sonra hər kəs normal həyata başlaya bilər.

- "Sumqayıt" ilk dəfə Avropa Liqasına vəsiqə qazansa da, vəziyyət məlumdur. Yaxşı hazırlıq, təlim-məşq toplanışı keçmək olmur. Komandaya nə dərəcədə təsiri olacaq?

- Belə deyək, məşqçiliyin çətin işlərindən biri odur ki, düşdüyün situasiyadan çıxmalısan. Yəni, o vəziyyətə görə düzgün qərar vermək lazımdır. Bu çətinlik bizim üçün bəhanə olmamalıdır. Bəli, düz qeyd edirsiniz ki, çox çətindir. Təlim-məşq toplanışları harada ola bilər, yoldaşlıq görüşləri keçiriləcək, ya yox. Yəni, həqiqətən çətindir. Amma inanıram ki, biz- rəhbərlik, mən, məşqçilərim, yanımdakı köməkçilərim ən  düzgün qərarı verib, yaxşı hazırlıq keçə bilərik. 

- Avropada uğur üçün yaxşı heyət olmalıdır. Sizdə varmı?

- Əlbəttə. Əvvəlcə bilirsiniz ki, klubun bünövrəsi olmalıdır. Şükürlər olsun, bu gün klubumuzda bünövrə var. Məni ən çox narahat edən məqamlardan da biri odur ki, biz həmin bünövrəni qoruyub, saxlamalıyıq. Avroliqada oynayacağıq, daha da çətin olacaq. Çünki komandalar ildən-ilə güclənir, rəqabət artır. Bizim üçün çox çətin idi. 2 komanda çempionluq, 6 komanda isə digər 2 yer uğrunda mübarizə aparırdı. Yəni, biz rahatlaşsaq ki, "Sumqayıt" Avropa Liqasına çıxdı və bununla hər şey oldu, səhv fikir olar. Bu, bizə gələcəkdə baha başa gələ bilər. Ondan sonra daha çətin, məsuliyyətli olur. Üzərimizə düşəni artıqlamasıyla etməliyik ki, klub bu yöndə davam etsin.

- Komanda Avroliqada ev oyunlarını harada keçirmək nəzərdə tutulub?

- Bu işlərlə rəhbərlik məşğul olur. Bilirəm ki, Sumqayıt Şəhər Stadionunu sifariş vermişik. Mən də komandanın Sumqayıtda oynamağını çox istəyirəm. Çünki həm o stadion bizim üçün doğmadır, həm də öz azarkeşlərimizin qarşısında oynayarıq. İnşallah, ümid edirəm ki, avqust ayına kimi pandemiyanın yayılması azalar və matçlarda azarkeşlərin iştirakına icazə verilər. Ən əsası, oyunların Sumqayıt şəhərində keçirilməsini çox istəyirəm.

- Pandemiya ilə bağlı komandada müqaviləsi bu mövsümün sonunadək uzadılan futbolçular var idi?

- Bəli. Biz futbolçularla söhbət etmişdik. Çempionat davam edəcəyi təqdirdə komandada qalacaqları haqda razılıq əldə etmişdik. Amma Premyer Liqa başa çatdı. Buna da ehtiyac olmadı. Müqaviləsi bitən həm futbolçular, həm də məşqçilər var. İnşallah, yaxın bir zamanda bu suallara cavab verəcəyik.

- Bəs, gedənlər var?

- Qeyd etdiyim kimi, çalışacağam ki, bünövrəni qoruyub-saxlayaq.  Ola bilər ki, hansısa futbolçu özü komandanı tərk etmək istəsin. Belə olduğu halda əlbəttə biz oturub, qərar verəcəyik. Amma sırf bu yöndə hələlik qərarlarımız yoxdu. Çünki bilirsiniz, çempionatın başa çatması ilə bağlı qərar dünən verilib.

- Aleksey İsayevin Rusiya klubuna keçməsi barədə xəbərlər yayılıb. Bu, doğrudur?

- Mən Aleksey İsayevlə dünən (srağagün – red.) danışmışam. Bu xəbər yayılan kimi o özü zəng vurmuşdu. Həqiqətən “Sumqayıt”ın avrokuboka çıxmasına görə sevincinin həddi-hüdudu yox idi. Çox istəyirdi ki, "Sumqayıt" Avroliqada çıxış etsin və bu klubda olduğu üçün də xoşbəxt olduğunu bildirdi. Hələ gələcək karyerası haqda müzakirələrimiz olmayıb. Bilirsiniz ki, Aleksey burda deyil. Amma hər hansı bir klubla müqavilə bağladığını bizə bildirməyib. Dünən danışanda bu barədə hələ qərar vermədiyini özü açıqladı. Onun müqaviləsi bu il başa çatır.

- Bəs, Əmir Ağayev məsələsi nə yerdədir?

- Əmir Ağayev də bizim önəmli futbolçularımızdandır. Həqiqətən öz liderlik keyfiyyəti, bacarığı ilə fərqlənir. Biz Əmiri transfer edəndə ondakı bacarığı bilirdik. Həqiqətən bildirim ki, o, hətta Azərbaycan millisinə rahat şəkildə dəvət ala bilər. Əmir Ağayev növbəti mövsüm üçün komandada görmək istədiyim futbolçulardandır. Yenə deyirəm, müqaviləsi bitən oyunçularla yaxın zamanlarda yəqin ki, yekun danışıq olar. Bundan sonra rəsmi bir məlumat vermək olar.

- Komandaya yeni transferlər etməklə bağlı nə düşünürsünüz?

- Əlbəttə ki, gedən olacaqsa və ya ayrılmasalar belə bizim bəzi mövqelər üçün  oyunçulara, rəqabətə ehtiyacımız var. Bunun da üzərində seleksiyamızı aparacağıq.

- Bəs, planda hansı futbolçular var?

- Bilirsiniz ki, bizim böyük seçimimiz də yoxdur. Amma nəzərimizdə olan futbolçular var. İnşallah, onları komandada görmək istəyərik. Əlbəttə ki, burada maliyyə də əhəmiyyətlidir. Həmin oyunçuları transfer etməyə gücümüz çatmalıdır.

- Maliyyədən söz düşmüşkən, Avroliqa məsələsinə görə əvvəlki illərdən fərqlənəcəkmi?

- Yəqin ki, klub rəhbəri bu barədə məlumat verər. Klubun müşahidə şurası, sponsorları var. Onların da arzusu idi ki, komanda Avroliqaya çıxsın. Bu arzularına çatıblar. İnanıram ki, "Sumqayıt"ın güclənməsi üçün bacardıqları hər şeyi edəcəklər.

Ramiq AĞAMƏMMƏDOV