Piylənməsi olanlarda bu xəstəlik zamanı ölüm riski 50 faiz artır- XƏBƏRDARLIQ!

Tarix: 5 Sentyabr 2020 22:48

Piylənmə koronavirusa-COVID-19-a yoluxanlarda ölüm riskini 50 faizədək artırır.

Sonxeber.net e-tibb.az-a istinadən bildirir ki, bunu ABŞ-ın Şimali Karolina Universitetinin alimləri bildirib. Universitetin UNC Gillings Qlobal İctimai Səhiyyə Məktəbinin professoru Barry Popkinin rəhbərlik etdiyi araşdırmanın nəticəsində bildirilib ki, piylənmədən əziyyət çəkənlərdə COVID-19-dan ölüm riski 48 faiz artır. Tədqiqatın nəticələri "Obesity Reviews" jurnalında dərc edilib. Alimlər, COVID-19-a yoluxan, ağırlaşaraq reanimasiyada müalicə olunan artıq çəkili insanların sayının çox olmasına görə heyrətə gəldiklərini bildiriblər. Araşdırmada piylənmənin orqanizmin infeksiya ilə mübarizə aparmasını çətinləşdirən insulin rezistentliyi (müqaviməti) və iltihablaşma kimi metabolik dəyişikliklərə səbəb olduğu vurğulanıb.

Alimlər bildirib ki, piylənməsi olan insanlarda virusa yoluxma zamanı reanimasiyaya düşmə nisbəti 74 faiz artır.

Qeyd olunub ki, SARS və qrip peyvəndləri ilə bağlı mövcud təcrübədən çıxış edərək COVID-19 vaksininin artıq çəkili insanlara daha az təsir edəcəyi də narahatlıq doğurur.