Naftalanda 5 ailə üzvünü itirən hərbçi - “Cəbhəyə dönəcəyəm” - VİDEO

Tarix: 21 Oktyabr 2020 19:26

Məlum olduğu kimi, sentyabrın 27-də işğalçı Ermənistanın silahlı birləşmələrinin ölkəmizin dinc əhalisinə atəş açması nəticəsində Naftalanın Qaşaltı kəndinin sakini Nadir Qurbanovun 5 ailə üzvü həlak olmuşdu.

Sonxeber.net qafqazinfo-ya istinadən xəbər verir ki, ötən gün Rusiyanın "Dojd" telekanalı Nadir Qurbanovdan sentyabrın 27-də hadisə yerində aldığı qısa müsahibəni yayımlayıb. Məlum olub ki, ailə faciəsi yaşayan həmin şəxs hərbçi imiş:

"Nə baş verdiyi göz önündədir. Mənim atam, anam, yoldaşım, oğlum və qardaşımın qızı - hamısı burada idi, hamısı da həlak oldu. Bundan artıq nə demək olar?!"

6 il Azərbaycan ordusunda xidmət edən Nadir Qurbanov Türkiyənin Anadolu Agentliyinə verdiyi müsahibədə də həmin vaxt cəbhədə olduğunu və hücumlar kəskinləşdiyi zaman ailəsi ilə əlaqə saxladığını, ancaq anası və yoldaşının başqa yerə getməyə razı olmadıqlarını bildirib.

Qaraqoyunlu kəndinə təxminən 20 mərmi düşdüyünü xatırladan Qurbanov, "Bunların dördüncüsü evimə düşdü. Xəbər alan kimi dərhal gəldim",-deyə qeyd edib.

Qurbanov evə çatdıqda dəhşətli bir mənzərə ilə qarşılaşdığını və yerdə 15 illik yoldaşı, anası, atası və 2 uşağın cəsədlərini gördüyünü bildirib.

O, Bakıda oxuyan böyük oğlundan başqa ailəsindən heç kimin sağ qalmadığını qeyd edib.

"Bundan sonra nə etməyi düşünürsən?" sualına isə "Sağ qalan yeganə oğlumu ən yaxşı şəkildə böyüdə bilmək istəyirəm", - deyə cavab verib.

Qurbanov, həyatındakı ən dəyərli sərvəti olan ailəsini xatırladan evə və evin həyətinə addım ata bilməyəcəyini, hər dəfə evə baxanda ailəsində olan xatirələrin gözündə canlandığını və bu ağrıya dözə bilmədiyini bildirib.

Yenidən cəbhəyə getməyə hazırlaşdığını söyləyən hərbçi, "Vətənimə təşəkkür edirəm. Lazım olsa canımı da verərəm. Qoy dövlət və millətimiz mövcud olsun. Mən indi cəbhədə deyiləm, amma yaxın gələcəkdə cəbhəyə gedəcəyəm",-deyə qeyd edib.