Şəhid bulağı istifadəyə verilib - VİDEO

Tarix: 12 Iyul 2021 20:14

Qubada şəhid Mehdi Murtuzovun xatirəsinə bulaq kompleksi inşa edilib

Sonxeber.net Real TV-ə istinadən bildirir ki, Quba rayonun Alpan kəndində Vətən müharibəsində şəhid olan Murtuzov Mehdi Muxtar oğlunun xatirəsinə bulaq kompleksi inşa edilib.

Şəhidin doğulub boya başa çatdığı evin qarşısında tikilən abidənin bu gün açılışı oldu. Açılış mərasimində rayon icra hakimiyyətinin nümayəndələri, kənd sakinləri və şəhid valideynləri iştirak etdi.

Çıxış edənlər 44 günlük Vətən müharibəsində ordumuzun qazandığı tarixi qələbəndə söz açdılar.

Qeyd edildi ki, Müzəffər Ali Baş Komandanın rəhbərliyi ilə qəhrəman hərbçilərimiz qanı, canı bahasına torpaqlarımızı azad etdi. Bu amal uğrunda şəhid olan qəhrəmanlar hər zaman xalqımızın qəblində yaşayacaq. Mərasimdə məktəblilər şəhidlərimizə həsr edilən şeirlər səsləndirdi. Sonda mərasim iştikaçıları tərəfindən abidə önünə tər güllər düzüldü.

Qeyd edək ki, 24 yaşlı Mehdi Murtuzov Vətən Müharibəsi başlayan zaman müddətdən artıq hərbi qulluqçu kimi xidmətdə olub. İlk gündən savaşa qatılan gənc qəhrəman Murovdağ zirvəsinin azad olunması uğrunda gedən qızğın döyüşdə snayper gülləsinə tuş gələrək şəhadətə yüksəlib.

Mərasimdə qeyd edildi ki, şəhidlərin əziz xatirəsinə ucaldılan abidə həm də gənc nəsilin vətənpərvər ruhda böyüməsində müstəsna rola malikdir.

Canını vətənə fəda edən qəhrəmanla bu gün təkcə yaxınları deyil onu tanıyan hər kəs qürür duyur.

Qeyd edək ki, 44 günlük zəfər yürüşümüzdə göstərdiyi şücaətinə görə, Mehdi Murtuzov Vətən uğrunda, İgidliyə görə və Kəlbəcərin azad olunmasına görə medalları ilə təltif edilib.