İŞİD Kabil aeroportunu qana boyadı: 60 ölü, 140 yaralı - YENİLƏNİB - FOTO

Tarix: 26 Avqust 2021 23:20

23:18

Kabil hava limanında baş verən partlayışlar nəticəsində 60 nəfər ölüb, 140 nəfər yaralanıb.

Sonxeber.net bildirir ki, bu barədə TOLOnews məlumat yayıb.

21:18

Əfqanıstanın paytaxtı Kabildəki Həmid Kərzay adına beynəlxalq hava limanının girişi önündəki iki partlayışa görə məsuliyyəti İŞİD öz üzərinə götürüb.

Sonxeber.net TOLOnews-a istinadən bildirir ki, iki partlayışda həlak olanların sayı 43 nəfərə, yaralıların sayı 130-a çatıb.

İlk partlayışı "Baron" otelinin önündə "canlı bomba" törədib. Daha sonra "Abbey" giriş darvazasının qarşısında içi partladıcı maddə ilə dolu avtombildən istifadə olunub.

18:44

Kabil hava limanında terrorçu-kamikadzenin özünü partlatması nəticəsində 13 nəfər həlak olub.

APA-nın məlumatına görə, bu barədə "Taliban" hərəkatı açıqlama yayıb.

-------

18:36

Kabil hava limanının girişində partlayış törədilib.

Sonxeber.net APA-ya istinadən bildirir ki, partlayış britaniyalı hərbi qulluqçuların bir müddətdir dayandığı və hava limanının terror xəbərdarlığı səbəbi ilə bağlanmış 3 giriş qapısından birində baş verib.

ABŞ rəsmisi "Reuters" xəbər agentliyinə partlayışın terrorçu-kamikadze tərəfindən törədildiyini bildirib. Böyük Britaniya Müdafiə Nazirliyi partlayış nəticəsində itkilərin olmadığını, lakin əminliklə danışmaq üçün hələ tez olduğunu deyib.

"Pajhwok" agentliyi 2 nəfərin öldüyünü, 15 nəfərin yaralandığını açıqlayıb.

Pentaqondan verilən məlumata görə isə 3 ABŞ hərbçisi xəsarət alıb.

Qeyd edək ki, partlayışdan sonra hadisə yerində silah səslərinin eşidilməsi ilə bağlı məlumat yayılıb.