Kuperoz - üz dərisində kapilyar toru: səbəblər və müalicə

Tarix: 12 Oktyabr 2021 22:15

Kuperoz üz dərisində qırmızı kapilyarlar torunun olmasıdır. Kuperoz əksər hallarda dərisi nazık, ağ və həssas olan insanlarda müşahidə olunur.

Adətən kuperoz burun və yanaqlar, bəzən alın və çənə nahiyəsində olur. Kuperoz bədən dərisində də ola bilər.

Kuperoz bir çox hallarda heç bir ciddi xəstəliyin əlaməti olmur və yalnız kosmetik defekt yaradır. Bir çox hallarda kuperozun səbəbi irsiyyat olur. Belə insanların damarları zəif, kövrək olur və bu varikozun inkişafına səbəb ola bilər. Bu halda kuperoz uşaq vaxtında əmələ gəlməyə başlayır və ailənin bir çox üzvlərində müşahidə olunur.

Bəzən kuperozun səbəbi hormonal pozulmalar, mədə və qara ciyərin xroniki xəstəlikləri, immunitetin zəifləməsi, güclü xroniki streslər, açıq havada (küləkdə, şaxtada və s.) tez-tez olması, bəzi dəri xəstəlikləri və s. ola bilər.

Əgər sizdə kuperoza meyillik varsa bu kimi qaydalara əməl edin:

- Tərkibində spirt, turşu olan üz üçün qullaq vasitələri, tərkibində kobud dənəciklər olan skrablar istifadə etmək olmaz. Kuperozu olan insanlar üçün xüsusi qulluq vasitələri var. Xüsusi antikuperoz vasitələr dərinin kapilyarlarını möhkəmləndirir. Belə vasitələrin tərkibində yaşıl çayın ekstraktı, rutin, üzüm çəyirdəklərinin yağı, qinko biloba və s. təbii komponentlər olur.

- Dərinin əllə təmizlənməsi, pilinq, üzün lazerlə cilalanması, vakuum təmizlənmə, bal massajı, xüsusi şotka ilə massaj əks göstərişdir. Belə dəriyə ültrasəs təmizlənmə üsulu, yumşaq pilinqlər daha uyğundur.

- Dərinin buxara verilməsi, isindirici (termik) maskalar, isindirici kompreslər kuperoza meyilli olan insanlar üçün ziyanlıdır.

- Belə insanlar hamam və saunaya getməməli, inhalyasiya etməməli, isti su ilə üzünü yumamalıdır. Üzünü ilıq və ya sərin su ilə yumaq olar.

- Fiziki gərginliklər və ağır əşyaların qaldırılması da əks-göstərişdir.

- Günün altında uzun müddət ərzində olmaq, solyariyə getmək olmaz.

- Daim çox isti, acı, ədviyyatlı qidaların, spirtli içkilərin qəbulu kuperozun artmasına səbəb olacaq.

- Hərarətin tez-tez kəskin növbələşməsi (çöldə soyuq hava, evdə isti) də ziyanlıdır.

- Kuperozu olan insanlar dərini daim günəşdən, küləkdən qorumalı, dərini daim nəmləndirməlidir.

- C vitamini və rutin kuperozla mübarizədə kömək edir (bu maddələr askorutin preparatın tərkibinə daxildir).

Müasir kosmetologiyda kuperozla mübarizədə elektrokoaqulyasiya, lazerlə müalicə, ozonoterapiya, fototerapiya, mezoterapiya kimi üsullar istifadə olunur. Hər bir konkret halda müalicə üsulu həkim dermatokosmetoloq tərəfindən seçilir. Bu kuperozun yerləşməsindən, dərinliyindən və s. amillərdən asılıdır.