Qəbələ Dövlət Peşə Təhsil Mərkəzinin tələbələrinin qiymətləndirməsi müəssisələr tərəfindən aparılacaq

Tarix: 5 Sentyabr 2019 13:28

Bakı. İlhamə İsabalayeva - Trend:

Qəbələ Dövlət Peşə Təhsil Mərkəzinin nəzdində yaradılan Məşvərət Şurasının əsasnaməsi təsdiq edilib.

Təhsil Nazirliyindən Trend-ə verilən məlumata görə, Məşvərət Şurası Qəbələ Peşə Təhsil Mərkəzi ilə regionda fəaliyyət göstərən özəl sektor arasında əməkdaşlığı gücləndirmək məqsədilə yaradılıb.

Şura ilk mərhələdə tədris planlarının razılaşdırılması, kurikulumlara baxılması və təkmilləşdirilməsi, tələbələrin qiymətləndirməsinin müəssisələr tərəfindən aparılması, karyera mərkəzinin, məktəbdə müəssisə guşələrinin yaradılması kimi fəaliyyətləri həyata keçirəcək.

Qeyd edək ki, Qəbələ, İsmayıllı və Qax rayonlarında kənd təsərrüfatı və turizm sahəsində duala bənzər peşə təhsili və təlimi (PTT) pilotlarının yaradılması (ED VET) layihəsi Avropa İttifaqı və Almaniya Federal İqtisadi Əməkdaşlıq və İnkişaf Nazirliyinin (BMZ) tərəfindən maliyyələşir.

Layihənin məqsədi Qəbələ, İsmayıllı və Qax rayonlarında yerləşən 3 pilot peşə məktəbində Almaniyanın duala bənzər PTT yanaşmasının tətbiqi ilə kənd təsərrüfatı və turizm sahələrində peşə təhsili və təliminin cəlbediciliyini artırmaq, əmək bazarına uyğunluğunu təmin etməkdir.

Trend-in ən mühüm və maraqlı xəbərlərini "Telegram"da izləyin