''Qadın yalvarırdı, amma heç nə edə bilmədik'' - FOTO

Tarix: 17 Fevral 2022 09:10

"Ailəmdən kimsə qalmadı. Hamı həlak olub. Sadəcə, mən sağam".

43 yaşlı Prissilla Neves göz yaşlarını saxlaya bilmir, hönkürür.

O, sel və torpaq sürüşməsi nəticəsində ailə üzvlərini itirmiş onlarla şəhər sakinindən biridir.

Braziliyanın Petropolis şəhərində (Rio-de-Janeyro ştatının dağlıq ərazisi) güclü yağışların səbəb olduğu torpaq sürüşməsi və daşqınların qurbanlarının sayı 94 nəfərə çatıb, ölənlərdən 8-i azyaşlıdır.

Şəhər meri Rubens Bomtemponun dediyinə görə, xilasetmə işləri davam edir.

Xilasetmə qrupları sürüşmənin baş verdiyi ərazilərdə axtarışları davam etdirir. Tibbi qruplar zərərçəkənlərə yardım göstərir.

Hökumət ştatda fövqəladə vəziyyət elan edib.

Yağışlardan ən çox zərər çəkən Offidjina bölgəsindəki torpaq sürüşmələri 80 yaşayış binasına ziyan vurub.

Qubernator Klaudio Kastronun sözlərinə görə, xilasedicilər indiyə qədər dağıntılar altından sağ qalan 24 nəfəri çıxarmağa müvəffəq olub. Qeyd edilir ki, dağıntılar altında ola biləcəyi ehtimal edilən daha 35 nəfərin axtarışları davam edir. Axtarış işlərində 400 xilasedici, 200 polis əməkdaşı, o cümlədən hərbçilər və könüllülər iştirak edir. Ştatın qubernatoru Klaudio Kastru fövqəladə vəziyyətin nəticələrinin aradan qaldırılması üçün idarələrarası səyləri əlaqələndirmək üçün çərşənbə axşamı axşamdan şəhərdə olub. O, mətbuata açıqlamasında "Bu, 1932-ci ildən bəri (şəhərdə) ən güclü yağış idi", - deyib.

Fövqəladə hallar xidmətlərinə 190-a yaxın sürüşmə və 230-a yaxın kiçik insident barədə məlumat daxil olub; 80 yaşayış binasına ziyan dəyib, onlardan azı 54-ü tamamilə dağılıb. Çərşənbə axşamı altı saat ərzində 260 mm yağıntının düşdüyü (aylıq normadan çox) şəhərin hakimiyyəti matəm və fövqəladə vəziyyət elan edib. Sinoptiklər yaxın bir neçə gün ərzində daha çox yağıntının olacağını proqnozlaşdırırlar.

Hazırda Moskvada səfərdə olan Braziliya Prezidenti Jair Bolsonaro sosial şəbəkələrdə bildirib ki, təbii fəlakətdən zərər çəkənlərə federal yardımın göstərilməsinə göstəriş verib.

Bir zamanlar Braziliyada imperatorun yay iqamətgahı sayılan Petropolis şəhəri indi viran qalıb. Hər tərəf döyüşdən sonrakı xarabazara bənzəyir.

Şəhər turistlər arasında populyar məkan olsa da, o, torpaq sürüşmələrinə meylli yerdədədir.

Petropolisdə ən qorxunc insident 2011-ci ildə yaşanmışdı. Sel nəticəsində Petropolisdə və qonşu şəhərlərdə 903 nəfər həlak olmuşdu.

... 49 yaşlı Rosalia Vircilo ağlayır. O, yardım istəyən qadını xilas edə bilmədiyini deyirr: "Dünən bir qadın xarabalıqlar altından qışqırırdı: "Kömək edin! Çıxarın məni buradan!" Amma biz heç nə edə bilmədik. Palçıq, su daşdı, qadın boğulub öldü".