Ən təmiz havalı ölkələr məlum oldu

Tarix: 24 Mart 2022 12:32

İsveçrənin "IQAir" şirkətinin mütəxəssisləri müəyyən ediblər ki, 6475 şəhərdən yalnız 222-nin orta hava keyfiyyəti Ümümdünya Səhiyyə Təşkilatının standartlarına cavab verir.

Sonxeber.net oxu.az-a istinadən bildirir ki, tədqiqatdakı bütün məlumatlar dünya üzrə yerüstü hava keyfiyyəti stansiyalarından istifadə etməklə toplanıb. Məlumat real vaxt rejimində alınıb.

ÜST tələblərinə görə, havadakı təhlükəli PM2.5 hissəciklərinin orta səviyyəsi ildə bir kubmetr üçün 5 mikroqramdan çox olmamalıdır.

Bütün məlumatların təhlilinə əsasən, havanın ən çirkli olduğu dövlət Banqladeş, ən çirkli paytaxt isə Yeni Dehli (Hindistan) olub. Banqladeşi Çad, Pakistan, Tacikistan, Hindistan, Oman, Qırğızıstan, Bəhreyn, İraq, Nepal kimi ölkələr izləyir. Eyni zamanda Hindistan, Banqladeş və Pakistanda havanın çirklənmə səviyyəsi normadan 10 dəfə yüksəkdir.

Bununla yanaşı, ən keyfiyyətli hava Norveç, Danimarka, İsveç, Avstraliya, Yaponiya, Kanada, Böyük Britaniyada qeydə alınıb. Həmçinin, Yeni Kaledoniya, ABŞ-ın Virciniya adaları, Puerto-Riko, Kape Verde, Finlandiya, Qrenada, Baham adaları, Avstraliya, Estoniya da reytinqin yuxarı pillələrində qərarlaşıb.