Misir Mərdanovdan Təhsil Nazirliyinin adının dəyişməsinə REAKSİYA

Tarix: 28 Iyul 2022 21:38

Xəbər verdiyimiz kimi, bu gün Prezident İlham Əliyevin imzaladığı yeni fərmana görə, Təhsil Nazirliyi Azərbaycan Respublikasının Elm və Təhsil Nazirliyi adlandırılıb.

Sonxeber.net redaktor.az-a istinadən bildirir ki, sənədə əsasən, elm sahəsində dövlət siyasətinin və tənzimlənmənin həyata keçirilməsi, müəssisə və təşkilatların elmi fəaliyyətinin əlaqələndirilməsi və istiqamətləndirilməsi ilə bağlı səlahiyyətlər yeni nazirliyə həvalə edilib.

Yeni fərmana keçmiş təhsil naziri, Azərbaycan Milli Elmlər Akademiyasının (AMEA) Riyaziyyat və Mexanika İnstitutunun direktoru, professor Misir Mərdanovun münasibətini öyrənməyə çalışdıq.
"Cənab Prezidentin qəbul etdiyi bütün qərarlara münasibətim yalnız müsbət ola bilər. Ona görə də, əlavə şərhə ehtiyac duymuram. Əgər ölkə rəhbəri belə bir qərar qəbul edibsə, onu yerinə yetirmək hər birimizin borcudur", - deyə o, bildirdi.

Yeni yaradılan Elm və Təhsil Nazirliyinin Azərbaycan elminin və təhsilinin inkişafına hansı töhfələrin verəcəyi məsələsinə də toxunan professor qeyd etdi ki, bu barədə indidən nəsə demək hələ tezdir:

"Qarşıdakı günlərdə görək birləşmə necə olacaq? Ondan sonra bu məsələyə geniş münasibət bildirərik".