Şagirdi döyülən məktəbin rəhbəri: “Xəbərimiz var idi” - VİDEO

Tarix: 5 Oktyabr 2022 15:54

Paytaxtın Sabunçu rayonunda yerləşən 112 saylı məktəbdə xoşagəlməz hadisə yaşanıb. Şagirdlərdən biri digərini döyüb. Otaqda olan başqa bir şagird isə olanları telefonla lentə alıb. Görüntülər sosial şəbəkələrdə yayıldıqdan sonra aidiyyəti qurumlar hərəkətə keçiblər. Məsələ ilə bağlı Daxili İşlər Nazirliyindən bildirilib ki, hər iki məktəbli valideynləri ilə birgə polisə dəvət olunub və izahatları alınıb. Faktla bağlı araşdırmalar davam etdirilir/

Əvvəlcə üzünə yumruqla vurur. Daha sonra sinif yoldaşını yerə yıxaraq döyür. Ard-arda təpik-yumruq zərbələri endirir. Başqa şagird isə olanları telefonla çəkir.
Xoşagəlməz hadisə Sabunçu rayonu Pirşağı qəsəbəsində yerləşən orta məktəbdə qeydə alınıb.

Övladları 112 nömrəli məktəbdə təhsil alan valideynlər görüntüləri izlədikdən sonra dəhşətə gəldiklərini bildirdilər.

Sonxeber.net Xəzər Xəbər-ə istinadən xəbər verir ki, məktəbin direktorunu əvəz edən Lətifə Mustafayevə bildirib ki, hadisə sentyabrın 30-da baş verib. Görüntüləri çəkən şagird həmin gün məktəbə iki mobil telefon gətirərək birini sinif rəhbərinə təhvil versə də, digərini özündə saxlayıb. Lətifə Mustafayeva əlavə edib ki, şagirdin döyülməsi faktı ilə bağlı Bakı Şəhəri üzrə Təhsil İdarəsi tərəfindən müvafiq araşdırma aparılır. Məsələ ilə bağlı hüquq-mühafizə orqanlarına da məlumat verilib.

Məsələ ilə bağlı Daxili işlər nazirliyinin şöbə rəisi Elşad Hacıyev bildirib ki, şagirdlərdən biri digərinin ünvanına nalayiq ifadələr işlətdiyi üçün onunla mübahisə edib.Döyülən şagirdə dəyən xəsarətin dərəcəsini müəyyənləşdirmək üçün tibbi ekspertiza təyin olunub. ''Hər iki məktəbli valideynləri ilə birgə polis orqanına dəvət olunub və izahatları alınıb. Faktla bağlı araşdırmalar davam etdirilir''- deyə o əlavə edib.

Hadisə ilə bağlı Baş Prokurorluq da məlumat yayıb. Bildirilib ki, hadisə ilə bağlı baş prokurorluğun cinayət təqibindən kənar icraatlar idarəsində də araşdırma aparılıb. Nəticədə  faktla bağlı inzibati xəta haqqında iş üzrə icraat başlanaraq baxılması üçün aidiyyəti üzrə sabunçu rayon icra hakimiyyəti yanında yetkinlik yaşına çatmayanların işləri və hüquqlarının müdafiəsi üzrə komissiyasına göndərilib.