Bank qadını ölü bildi, pullarını kəsdi

Tarix: 11 Oktyabr 2022 20:28

Britaniyanın İst-Raydinq-of-Yorkşir əyalətinin Bridlinqton şəhərinin sakini bankın səhvən onu ölü kimi tanıması səbəbindən bir neçə həftə pulsuz qalıb.

Sonxeber.net bildirir ki, bu barədə "The Sun" məlumat yayıb.

30 yaşlı Natali Holdsvort nənəsi Ellin Makevoya baxıb. Nənənin pensiyası hər ay nəvənin hesabına gəlib. 2021-ci ilin may ayında nənə ölüb və bank səhvən nəvəsini ölü kimi tanıyıb. "Təxminən mayın 17-də ölü kimi tanındığımı ilk dəfə anladım. Mağazaya getdim və alış-verişin pulunu kartla ödəməyə çalışdım, lakin ödəniş baş tutmadı. Hesabda pul olduğuna əmin idim, ona görə də problemin nə olduğunu başa düşmədim", - britaniyalı deyib.

Qadın mağazadan çıxıb və dərhal banka zəng edib. Bankın müştəri xidməti ondan məlumatlarını daxil etməyi xahiş edib. "Birdən zəng melodiyası eşitdim, ondan sonra bir qadın telefona gəldi və dedi: "Salam. Siz ölənlərin yaxınlarının dəstək qaynar xəttinə zəng etdiniz". Mən ona kim olduğumu söylədim. O, cavab verdi: "Oh, mən sizin mayın 1-də öldüyünüzü qeyd etmişəm", - Holdsvort danışıb. Bank müştərisi şoka düşüb. "Sizinlə telefonla danışdığım üçün ölmədiyim açıq-aydın anlaşılır", - o deyib.

Britaniyalı qadın bank işçisinə nənəsinin həqiqətən öldüyünü izah edib. Hesabını bərpa edəcəyinə söz verilənə qədər o, dəstək işçiləri ilə telefonla üç saat danışıb. Ancaq hesabı yalnız bir neçə həftədən sonra bərpa olunub.

"Növbəti problem o idi ki, nənəmin dəfni üçün pul ödəməli idim. Baş verənləri dəfn evinə danışdım. Onlara borcum olduğu üçün ağlayırdım və üzülürdüm. Mənə köməklik etmələrini xahiş etdim, amma onlar dedilər ki, heç vaxt belə hal haqda eşitməyiblər. Təcili kredit götürmək istədim. Bu, tamamilə dəlilik idi", - o deyib.

Holdsvortun hesabı bərpa edildikdən sonra o, banka gedib və mənəvi ziyana görə kompensasiya tələb edib. Amma bank ona çox az təzminat təklif edib. "Üç saatlıq telefon danışığımın əvəzini çıxmaq üçün mənə 11 funt təklif etdilər. Mən elə bilirdim ki, onlar zarafat edirlər", - o, etiraz edib. Britaniyalı qadın daha çox təzminat tələb edib və bank 73 funt sterlinq ödəməyə razılaşıb. Daha sonra maliyyə ombudsmanı onun işinə baxıb və mübahisəni həll etmək üçün 1,2 min funt sterlinq ödəyib. Qadın bu məbləği ədalətsiz hesab edib. O, hələ də bank xətası səbəbindən yaranan problemlərlə üzləşir.

Bank Holdsvortun itkisinə görə təəssüfləndiklərini və bank hesabındakı problemin ona yaratdığı narahatçılığı anladıqlarını bildiriblər: "Xanım Holdsvort bizimlə əlaqə saxladıqda, biz dərhal onun hesabını blokdan çıxartdıq və ona bir həftədən az müddətə yeni kart verdik. Baş verənlərlə bağlı onun çəkdiyi xərcləri ödəməyə razılaşdıq. Kompensasiya olaraq əlavə ödəniş etdik".

İrfan Vəliyev