Yuxusuzluğa “yox” deyək!

Tarix: 5 Yanvar 2023 23:33

Yuxusuzluq insanın orqanizmi üçün çox ziyanlıdır. Bu halda insanın sinir, ürək-damar, immun və s. sistemlərinə böyük zərər vurulur. Həkimlərin rəyinə görə, yuxusuzluq hətta insanın həyatını qısaldır!

İnsan orqanizmi "melatonin" adlı hormon hazırlayır. Bu hormona "yuxu hormonu" deyilir. Cavan insanlarda yuxusuzluğun əsas səbəbi olan stres, həyacanlanmalar və s. zamanı orqanizmində stres hormonların - adrenalin və kortizolun - hazırlanması artır ki, nəticədə melatoninin hazırlanması azalır.

Yuxusuzluq zamanı insanlar tez-tez yuxugətirici həblərdən istifadə etməyə çalışırlar. Bu böyük səhvdir! İnsan orqanizmi bu dərmanlara tez öyrəşir və daha artıq dozaları tələb edir ki, bu da böyük təhlükə yaradır. Böyük dozalarda yuxugətirici dərmanlarının qəbulu çox ziyanlıdır və hətta ölümə gətirib çıxara bilər.

Yuxusuzluqla mübarizədə bizim məsləhətlərimiz sizə kömək edə bilər:

- yatmamışdan əvvəl çox yemək yeməyin. Həddindən artıq doldurulmuş mədə rahat yuxuya getməyə əngəl olacaq. Axırıncı yemək qəbulu yuxudan 3-4 saat əvvəl olmalıdır. Lakin aclıq hissi də sizə tez yuxuya getməyə imkan verməyəcək. Bu halda 1 stəkan kefir içmək və ya yüngül tərəvəz salatı yemək olar. Həkimlərin araşdırmalarına əsasən, süd, banan, müxtəlif çərəzlər (qoz, fındıq, badam və s.), balıq və digər dəniz məhsulları, ədviyyatlardan - zəfəran yuxusuzluqla mübarizədə yaxşı kömək edir. Bu məhsullar xüsusi amin turşusu "triptofanla" zəngindir. Triptofan orqanizmdə yuxu hormonu olan melatoninin hazırlanmasını artırır. Beləliklə, yatmamışdan əvvəl siz 1 banan, bir qədər çərəz, bir tikə bişmiş balıq yeyə bilərsiniz. Əgər sizin orqanizminiz südü yaxşı mənimsənyirsə (köpmə, qıcqırma və s. olmur), siz yatmamışdan əvvəl 1 stəkan bal və ya zəfəran suyu qatılmış süd içə bilərsiniz. Əks-halda, zəfəran suyu (bir qədər zəfəran qaynar suda dəmlənir) içmək olar.    

- yatmamışdan əvvə əqli fəaliyyəti ilə məşğul olmayın;

- yatmamışdan əvvəl 30 dəq. az olmayaraq açıq havada gəzin;

- isti vanna sizə tez yuxuya getməyə kömək edəcək. Suya nanə və ya çobanyastığı dəmləmələri, aromatik yağları (çobanyastığı və ya lavanda) əlavə etmək olar;

- yatmamışdan əvvəl sakit musiqiyə qulaq asın, bir neçə səhifə süjeti xoş olan bir kitab oxuyun;

- saat 23.00-dan gec yatmayın. Çalışın hər gün eyni vaxtda yatasınız;

- bitki tərkibli sakitləşdirici damcıları qəbul edə bilərsiniz (həkimlə məsləhətləşin!).

Əgər bütün bu üsullar sizə kömək etmirsə, həkimə müraciət edin. Yuxusuzluğun səbəbini araşdırandan sonra həkim sizə müalıcə təyin edəcək. Yuxunuz şirin olsun!