''Bu görüntüləri izləyəndə ürəyim dağa dönür''

Tarix: 9 Fevral 2023 05:25

Allaha qurban olum, yəqin ki, onun məsləhəti belə imiş. Yaradan yaşadanda, yaşadır da. Allah dünyamızı salamat, əmin-amanlıq etsin. Qardaş Türkiyədə baş verən zəlzələyə görə çox üzgünəm. Allah heç bir xalqa belə fəlakət göstərməsin. Biz qardaş ölkədə hər zaman gözəl, təmtəraqlı qarşılanmışıq. Türkiyə dövlətinin biləvasitə bizim sənətimizə böyük təsiri olub. Hər zaman qardaş ölkə olaraq Türkiyənin, türk qardaşlarımızın yanındayıq. Artıq dünəndən etibarən Fövqəlada Hallar Nazirliyinin işçiləri, həkimlərimiz zəlzələ bölgəsinə yola düşüblər. Bu andan etibarən isə insanların topladığı yardımlar yola düşür. Bütün bu görüntüləri izləyəndə ürəyim dağa dönür. Allah türkü, türkün dostunu qorusun"

Sonxeber.net xəbər verir ki, bunu moderator.az-a açıqlamasında xalq artisti, ustad xanəndə Alim Qasımov deyib. 

"Evdə oturub zümzümə edəndə bir də görürəm ki, artıq bu dünyanı unudub, o biri dünyama keçmişəm. Bu zaman o qədər mənə rahatlıq gəlir ki, içində nə enerji varsa hamısını çıxarmaq istəyirsən. İstəyirsən ki, sənin ifanı eşitsinlər, görsünlər. Qəribə hisslər yaranır. Özüm də təəccüblü qalıram ki, görəsən bu nədir? Bu yəqin ki, ilahidən gələn bir qüvvədir, qeyri-adilikdir" deyə sənətkar bildirib.

Alim Qasımov sənət dostu, ustadı Ağaxan Abdullayevi də xatırlayıb.

"Mən onun ilk tələbələrindən biri olmuşam. Əslində Əlibaba müəllimin sinfində oxumaq istəyirdim, amma mən məktəbə daxil olan ili o Asəf Zeynallı adına orta ixtisas məktəbindən çıxdı. Elə oldu ki, Ağaxan müəllimin sinfinə daxil oldum. Sinfə qonaq gələn kimi məni oxutdururdu. Mən hər zaman çalışmışam ki, müəllim-tələbə hörmətini qoruyub saxlayım. Onun qulluğunda sona qədər dura bilməsəm də, bacardığımı etmişəm. Muğamda kiçik bir incəlik etmişdim, böyütmüşdü bunu. Halbuki elə də böyük bir şey deyildi. O da Ağaxan müəllimin böyüklüyü idi. Təzə-təzə oxuyurdum, Ağaxan müəllim məni toylara aparırdı. O qədər sevinirdim ki" deyə sənətkar bildirib.