Şəfiqə Nağıyeva Elgizə niyə düşmən kəsilib? - VİDEO

Tarix: 19 Aprel 2023 20:40

Aparıcı Elgiz Əkbər vəkil Şəfiqə Nağıyevanın ona düşmən kəsildiyini açıqlayıb. 

Sonxeber.net bizim media-ya istinadən xəbər verir ki, bu haqda Elgiz aparıcısı olduğu "Elgizlə izlə" ictimai-sosial verilişində məlumat verib. 

Aparıcı bildirib ki, vəkil onun arxasınca həqiqət olmayan sözlər danışır: 

"Bu xanım məndən küsüb. Allah şahiddir ki, ona hər zaman yaxşı olmuşam. Dəyərini, qiymətini bilmişəm. Sonra aramızda bu verilişdə anlaşılmazlıq oldu. İndi isə bu adam mənə düşmən kəsilib, hər yerdə arxamca danışır, özü də olmayan şeyləri danışır, bunların da hamısı gəlir qulağıma çatır.  Mən buna çox üzülürəm.

Sözün var, gəl üzümə de. Mən sənə "verilişimdən get" deməmişəm. Heç kimə "get" deməmişəm. Özü qərar verib, gedib. Belə şeylər nəyə lazımdır? Çox gülünc şeylər baş verib. Bu isə məni çox üzür. Sənə heç bir pisliyim dəyməyib, sənə yaxşılıqdan başqa heç nə etməmişəm. Söhbətimiz olmayıb, davamız düşməyib, bir-birimizi təhqir etməmişik, acı söz deməmişik. Ömrümüzün sonuna kimi bir yerdə olmalı deyilik ki...
Hər şeyi əvvəli kimi, sonu da olur. Sən hər yerdə adamlar tutmusan, mən bunları çox gözəl başa düşürəm, uşaq deyiləm. 20 ilə yaxındır ki, səhnədəyəm. Sən də insanlarla çalışırsan. Sənə qarşı heç bir kinim-küdürətim yoxdur.

Mən də inciyə bilərəm, amma pislik arzulamaram, başqa-başqa fikirlər demərəm. Özü də sən gözəl bilirsən ki, haqqımda danışdığın şeyləri həmin adamlar gəlib çatdıracaqlar. Mən baş qoşmuram, gülürəm. Amma səbrim var və hər şeyin bir həddi var".

Ş.Nağıyevanı özünə dost-düşmən görmədiyini dönə-dönə vurğulayan Elgiz həmçinin çıxışında bildirib ki, qarşı tərəf yenə də onun verilişinə gəlsə, yenə də hörmətlə qarşılayacaq: 

"Birinci Allahını bil. Göydə Allah var. Böyüksən, yol göstərməlisən mənə. O səhvləri mən etsəm, deməlisən ki, etmə. Deyirsən ki, namaz qılıram, Allahın quluyam. Amma bunlar düz gəlmir bir-biri ilə. Danışmağa qalsa, mənim ağzımı yummaq olar? Allah göstərməsin. Amma bunu mən etmirəm, çünki hələlik səbr edirəm.
Yenə gəlsən, ayaq üstə qarşılayaram, hörmət göstərərəm. Sən məni niyə düşmən gözündə görürsən? Sənə nə etmişəm? İctimai şəkildə çıx de, sənə nə etmişəm? Mənə söz atmaq...

Neçə illər sən bu verilişdə oturmusan. İndi olduğun digər verilişlərdə başlayırsan mənim verilişimdə olan məsələlərdən danışmağa... İradlar tutur... Sən həmin an bu şeylər baş verəndə bəyəm verilişdə deyildin? Misal üçün, biz şou etmişik... Elə şounun ən birinci nümayəndəsi sən idin. İndi nə oldu, başlamısan arxamca nələrsə danışmağa?

Biz yenə də dostuq, səni düşmən gözümdə görmürəm. Sən verilişimdən gedəndən sonra biz bir neçə dəfə görüşdük də... Amma olmaz belə etmək. Lazım deyil... Göydə Allah var. Heç zaman heç kimin qəlbinə dəymərəm. Sabah gəl verilişimə, səni gül-çiçəklə qarşılayaram. Düşünmə ki, sənə pis münasibət göstərirəm və səni özümə düşmən görürəm".

Qeyd edək ki, bir müddət əvvəl "Elgizlə izlə" ictimai-sosial verilişində evlənmək üçün pənah gətirən şəxslə vəkil Şəfiqə Nağıyeva arasında qalmaqal yaşanıb. Əsəblərinə hakim kəsilə bilməyən vəkil həmin şəxsin hörmətsiz davranışlarına və nalayiq ifadələrə etiraz olaraq sözügedən verilişi birdəfəlik tərk edib.