Unudulmuş kənd... - Burada həyat XXI əsrdən çox əvvəli xatırladır - VİDEO

Tarix: 17 Iyul 2023 13:54

İsmayıllı rayonunun Keşxurt kəndində içməli su, yol, mavi yanacaq, tibb məntəqəsi və məktəb problemi yaşanır.

Milli.Az Xəzər TV-yə istinadən bildirir ki, gözdən-könüldən uzaq olan bu kənd rayon mərkəzindən 30 km uzaqlıqda yerləşir.

Bu kənddə cəmi 14 ailə  yaşayır. Kənd sakinləri su üzünə həsrət qalıb. Kənddə bulaq olsa da yay aylarında quruyur. Əlacsız qalan sakinlər ya su qabları ilə 7 km uzaqlıqda yerləşən qonşu kəndə gedirlər, ya da suyu pulla almalı olurlar. Yolsuz kəndə uzaq məsafədən gətirilən suyun qiyməti də ikiqat artır. Susuzluq səbəbindən kənddə ağaclar məhv olur, fərdi təsərrüfatlar sıradan çıxır.

Kənddə problem tək su ilə yekunlaşmır. Burada nə yol, nə mavi yanacaq, nə tibb məntəqəsi, nə market, nə də məktəb var. Kənddə yaşayan uşaqlar təhsil almaq üçün başqa  yerlərə üz tuturlar. Qalacaq yerləri olmayanlar isə ümumiyyətlə məktəb -  dərs nədir bilmirlər.

Kəndin icra nümayəndəsi Rüstəm Babayev  deyir ki, sözügedən yaşayış məntəqəsində içməli su üçün bulaqlar var, amma yay aylarında azalma müşahidə olunur. Kənddəki yolu isə  bələdiyyə öz daxili imkanları ilə hamarlayıb, çınqıl töküb. Elektrik xətlərinin qismən yarasız hissəsi yeni məftillərlə dəyişdirilib. Kənddəki uşaqların sayı az  olduğundan 2-3 uşaq qonşu kənd məktəbinə göndərilir.

Mövzu ilə bağlı daha ətraflı videomaterialı təqdim edirik.

Milli.Az