Rusiya 19 il əvvəl terror aktı törədən şəxsi müəyyən etdi

Tarix: 1 Sentyabr 2023 13:34

Rusiya İstintaq Komitəsi 2004-cü ildə Beslanda məktəbi ələ keçirən naməlum 5 silahlıdan birinin kimliyini müəyyən edib.

Sonxeber.net report-a istinadən xəbər verir ki, bu barədə "İzvestiya"ya Şimali Qafqaz Federal Dairəsi üzrə İstintaq Komitəsinin xüsusilə mühüm işlər üzrə böyük müstəntiqi Albert Xasauov açıqlama yayıb.

İstintaq sənədlərində "11 saylı döyüşçü" kimi qeyd edilən terrorçunun İnquşetiyaəsilli Aslanbek Parçiyev olduğu üzə çıxıb.

"Bu cinayət işinin istintaqı indiyədək dayandırılmayıb . Hazırda əməliyyat-istintaq tədbirləri davam etdirilir", - A.Xasauov bildirib.

Qeyd olunur ki, Parçiyevin şəxsiyyəti 2023-cü ilin mayında müəyyən edilib. İstintaq zamanı Parçiyevin qohumları tapılaraq dindirilib, genetik ekspertizası aparılıb. Nəticələr naməlum silahlının şəxsiyyətini təsdiqləyib.

Xatırladaq ki, 2004-cü il sentyabrın 1-də bir qrup silahlı Şimali Osetiyanın Beslan şəhərində məktəbə hücum edərək 1128 nəfəri girov götürmüşdü. Hadisədən iki gün sonra Rusiya xüsusi təyinatlıları girovların azad edilməsi istiqamətində əməliyyat keçirmişdi. Həmin əməliyyat nəticəsində 186-sı uşaq omaqla 333 nəfər ölmüşdü.