Aktual mövzular: Dollar alış-satışı, Neftin qiyməti, COP29, Hava proqnozu

Salyanda 36 yaşlı qadın əri tərəfindən qətlə yetirildi

Tarix: 1 Noyabr 2019 13:10

Bakı. Samir Əli - Trend:

Salyan rayonunda qadın həyat yoldaşı tərəfindən qətlə yetirilib.

Bu barədə Trend-ə Baş Prokurorluğun mətbuat xidmətindən məlumat verilib.

Məlumatda bildirilir ki, noyabrın 1-i saat 12 radələrində Salyan rayonu ərazisində 1983-cu il təvəllüdlü İlahə Hüseynovanın üzərində bıçaq xəsarətləri olan meyiti aşkarlanıb.

Daxil olan məlumat əsasında dərhal polis və prokurorluq əməkdaşlarının iştirakı ilə hadisə yerinə baxış keçirilib.

Faktla bağlı rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanılıb, müvafiq ekspertizalar təyin edilib.

İlkin istintaqla hadisənin 1982-ci il təvəllüdlü Salyan rayon sakini Nahid Huseynov tərəfindən ailə münaqişəsi zəminində bıçaqdan istifadə etməklə törədilməsinə əsaslı şübhələr müəyyən edilib. N.Hüseynov şübhəli şəxs qismində istintaqa cəlb olunub. N.Hüseynov qətlə yetirilən İ.Hüseynovanın həyat yoldaşıdır.

Hazırda iş üzrə zəruri və təxirəsalınmaz istintaq hərəkətləri və əməliyyat-axtarış tədbirləri davam etdirilir.

Trend-in ən mühüm və maraqlı xəbərlərini "Telegram"da izləyin

Whatsapp ilə göndər