Avropa Parlamenti Avropa Komissiyasını məhkəməyə verəcək

Tarix: 12 Mart 2024 11:42

Avropa Parlamenti Macarıstana 10,2 milyard avro ödəndiyi üçün Avropa Komissiyasını məhkəməyə verməyi planlaşdırır.

Sonxeber.net APA-ya istinadən bildirir ki, bu barədə prosesdən xəbərdar mənbələr bildirib.

Bu məsələ Avropa Komissiyasının Prezidenti Ursula von der Leyenin keçən ilin dekabrında korrupsiya və qanunun aliliyi ilə bağlı narahatlıqlara görə dondurulmuş Budapeşt üçün ayrılan Aİ fondlarını blokdan çıxarmasından sonra meydana çıxıb. Bu addım Macarıstanın Baş naziri Viktor Orbanın İttifaqın Ukrayna ilə bağlı birgə mövqeyini pozmaqla hədələdiyi mühüm sammitdən əvvəl atılıb.

"Politico" yazır ki, Avropa Parlamentinin hüquq məsələləri üzrə komitəsi, vergi ödəyicilərinin pullarının sui-istifadə edilməsindən qorumaq öhdəliyini pozduğuna görə Avropa Komissiyasını məhkəməyə vermək qərarı ilə bağlı martın 11-də bağlı qapılar arxasında görüşüb.

Komitədə müvafiq qərar 16 üzv lehinə, bir üzv əleyhinə (sağçı partiyadan) olmaqla qəbul edilib.

Von der Leyenin öz siyasi qrupu, sağ mərkəzçi Avropa Xalq Partiyası, lideri Manfred Veber iyun ayında keçiriləcək Aİ seçkiləri ərəfəsində qanunun aliliyini müdafiə etməyin vacibliyini vurğulayaraq qərarı dəstəkləyir.

Nəşr yazır ki, ümumi müddəaların tənzimlənməsi çərçivəsində vəsaitlərin dondurulub-dondurulmamasına qərar verərkən Komissiyanın nə qədər sərbəstliyə malik olduğuna dair hələ heç bir presedent hüququ yoxdur. Lakin hakimlər ardıcıl olaraq məhkəmələrin müstəqilliyinin və Aİ-nin əsaslarının müdafiəsinin lehinə qərar veriblər.

Martın 14-də siyasi qrup liderləri görüşərək Avropa Parlamentinin Avropa Komissiyasını 25 mart tarixinə qədər məhkəməyə vermək üçün son razılığı verəcəklər. Brüsseldəki mənbələr bildirib ki, S&D, Yaşıllar, Sol və liberalların liderləri ilə yanaşı, Manfred Veber də bu addımın lehinə səs verəcək.