Mahir Emreli buna görə milliyə çağırılmadı

Tarix: 16 Mart 2024 11:46

"Anton Krivotsyuk və Mahir Emrelinin heyətdə olmaması zədə ilə bağlıdır. Hər iki futbolçumuzla danışmışam, zədələri var".

Milli.Az İdman.Biz-ə istinadən bildirir ki, bunu Azərbaycan millisinin baş məşqçisi Arif Əsədov deyib.

Təcrübəli mütəxəssis AFFA-nın saytına açıqlamasında "FİFA Series" üçün açıqladığı heyətə şərh verib: "Həkimlə də məsləhətləşdik və qərara aldıq ki, zədələrini sağaltsınlar və onları növbəti təlim-məşq toplanışlarına çağıraq. Yeni simalara gəlincə, Ukraynada çıxış edən Emil Mustafayev, Türkiyədə oynayan, çoxdandır milliyə çağırılmayan Vüsal İsgəndərli və "Neftçi"nin qapıçısı Rza Cəfərovu dəvət etdik. Yoldaşlıq oyunları olduğu üçün onları cəlb etdik ki, baxaq. Adətən, bu cür yoldaşlıq oyunlarında yeni futbolçular yoxlanılır".

Əsədov bildirib ki, bəzi oyunçuların U-21-ə kömək etməsi məqsədəuyğun sayılıb: "Qərara aldıq ki, üç gənc oyunçu - Emil Səfərov, Nəriman Axundzadə və Cəlal Hüseynov 21 yaşlılardan ibarət milli komandamızın düşərgəsinə getsinlər. U-21-i qarşıda rəsmi oyunlar gözləyir, ona görə də komandanın baş məşqçisi Samir Əliyevlə danışdıq ki, bu futbolçular İngiltərə və Ukrayna ilə görüşlərdə gənclər yığmasına kömək etsinlər".

Baş məşqçi yığmanın məqsədindən də danışıb: "Yoldaşlıq oyunlarında nəticə elə də ciddi önəm kəsb etməsə də, biz hər matça qələbə üçün çıxırıq. Qarşımıza qoyulan məqsədlərdən biri də odur ki, hər iki oyunda qələbə qazanaraq, komandanın əhval-ruhiyyəsini daha da yüksəldək. Çalışacağıq ki, qarşıdakı oyunlarda uğurlu nəticələr əldə edək".

Qeyd edək ki, Əsədov Monqolustan və Bolqarıstanla matçlara 24 futbolçu çağırıb, daha 4 oyunçunu ehtiyat siyahıya daxil edib.

Milli.Az