Tiflis uzaqlaşır, İrəvan silah ala bilməyəcək - Qureçki

Tarix: 10 Iyul 2024 09:02

Əgər Gürcüstan Qərbdən uzaqlaşmağa başlasa, o zaman Qərb üçün Ermənistanı dəstəkləmək çox çətin olacaq.

Sonxeber.net axar.az-a istinadən bildirir ki, bu sözləri polşalı politoloq Voyçex Qureçki erməni mediasına açıqlamasında deyib.

O, belə dəyişikliklərin Qərbin Ermənistana çıxışının olmamasına gətirib çıxaracağını bildirib.

Qureçkinin sözlərinə görə, hətta indi də Gürcüstan üzərindən bu əlaqəni saxlamaq o qədər asan deyil:

"Əgər Gürcüstan həqiqətən də xarici siyasət oriyentasiyasını dəyişsə, o zaman Ermənistana dəstək məsələsi daha da mürəkkəbləşəcək. Qərbin Ermənistanı dəstəkləmək arzusu var, lakin texniki cəhətdən bunu etmək çox çətin olacaq".

Ekspertin fikrincə, Gürcüstanda bu cür dəyişikliklər xüsusilə Qərbdən silah tədarükünə mənfi təsir göstərəcək. Buna baxmayaraq, o, Gürcüstanın Qərb kursundan yayındığını söyləmək üçün tez olduğunu bildirib. Vurğulayıb ki, hər şey oktyabrda keçirilən seçkilərdən sonra aydınlaşacaq.

Qeyd edək ki, ötən ay İrəvan və Paris "Sezar" özüyeriyən artilleriya sistemlərinin tədarükü ilə bağlı müqavilə imzalayıb. Ötən ilin oktyabrında isə üç GM-200 radarının İrəvana satışı haqqında saziş imzalanıb, həmçinin Fransanın "Mistral" yaxınmənzilli hava hücumundan müdafiə sistemlərinin gələcək tədarükü ilə bağlı anlaşma əldə edilib.