Xətai Sənət Mərkəzi ''Miniatür əsərlər guşəsi'' yaradıb – FOTO

Tarix: 18 Iyul 2024 13:36

Yaxın və Orta Şərq xalqları incəsənətinin maraqlı və zəngin hissəsini təşkil edən Azərbaycan "Miniatür sənəti" dünya incəsənəti tarixində özünəməxsus yer tutur və YUNESKO-nun qeyri-maddi mədəni irsi üzrə Reprezentativ Siyahısına daxil edilmişdir.

Kitab illüstrasiyası kimi yaranıb formalaşan Azərbaycan miniatür məktəbi XIV əsrin ortalarında qrafik və boyakarlıq üslublarının uğurlu sintezindən doğan bədii üslub ortaya qoymağa başladı. 

Günümüzdə də bir çox rəssamlarımız miniatür əsərlər yaradırlar və bu yöndə müxtəlif tədbirlər, o cümlədən, fərdi və qrup sərgiləri keçirilir.
Baxış müxtəlifliyi ilə fərqlənən miniatür əsərləri və ənənə həvəskarlarını bir arada görmək məqsədi ilə Azərbaycan Respublikası Mədəniyyət Nazirliyi, Azərbaycan Rəssamlar İttifaqı, Azərbaycan Dövlət Rəsm Qalereyasının dəstəyi ilə Xətai Sənət Mərkəzi "Miniatür əsərlər guşəsi" yaradıb.
Xətai Sənət Mərkəzinin direktoru Zahid Avazov: "Guşədə müasir Azərbaycan rəssamlarınin əsərləri ilə bərabər   Qacar, Təbriz, Moğol, Qaşqay, Herat, İsfahan və Səmərqənd    məktəbi nümunələridə sərgilənir. Xətai Sənət Mərkəzi "bir rəssamdan bir əsər" prinsipini əsas tutaraq guşəni daima yeniləməklə daha fərqi ekspozisiya yaratmağı qarşısına məqsəd qoymuşdur. Rəngarəng  və rəqabətə açıq çağdaş azərbaycan miniatürü naminə hər bir miniatür işləyən rəssamımızın yaradıcılığını  güşəmizdə görmək arzulayardıq".