Bakıda bu avtomobillər bahalaşıb

Tarix: 7 May 2019 20:44

Bakı. Xeyrəddin Nəsirzadə - Trend:

2019-cu ilin martında təkrar kiçiklitrajlı avtomobil bazarında (mühərrikin həcmi 2 litrədək) orta qiymət 14 870 manata bərabər olub.

Bunu Trend-ə "MBA Group" konsaltinq şirkətinin baş direktoru, ekspert Nüsrət İbrahimov deyib.

Ekspert qeyd edib ki, fevral ayı ilə müqayisədə 7,03 faiz artım müşahidə olunub. Mühərrikinin həcmi 2-3 litr olan avtomobillərin orta qiyməti 38 760 manat (11,21 faiz azalma), 3 litrdən yuxarı həcmli avtomobillərin orta qiyməti 91 143 manat (7,78 faiz azalma) təşkil edib.

N.İbrahimov bildirib ki, mart ayında paytaxtın avtomobil bazarında 1 352 avtomobil satışa çıxarılıb ki, bu da əvvəlki ayla müqayisədə 22,2 faiz azdır.

Məlumata görə, satışa çıxarılmış avtomobillərin 82,3 faizi benzin mühərrikli avtomobillərdir. Bu kateqoriyadan olan avtomobillərin orta qiyməti 41 129 manat olub. Dizel mühərrikli avtomobillər satışa çıxarılanların 17,7 faizini təşkil edib ki, bu avtomobillərin qiyməti 44 415 manata bərabər olub.

Ekspertin sözlərinə görə, mayda isə Bakının avtomobil bazarında qiymətlərin cüzi azalması gözləniləndir və may ayının yekunlarına əsasən azalma 1-2 faiz təşkil edəcək.

Trend-in ən mühüm və maraqlı xəbərlərini "Telegram"da izləyin