Süni intellekt infarktın da qarşısını ala bilir

Tarix: 10 Aprel 2025 05:12

Yeni bir tədqiqat süni intellektin ölümcül ürək ritm pozğunluqlarını iki həftə əvvəl proqnozlaşdırma qabiliyyətini ortaya qoyub.

Sonxeber.net xəbər verir ki, "European Heart Journal"da dərc olunan araşdırmaya görə, süni intellekt əsaslı alqoritm 240 mindən çox elektrokardioqram məlumatını təhlil edərək, ürək dayanması riskini yüksək olan xəstələrin 70%-ni dəqiq şəkildə müəyyən edə bilir. Bu, ürək xəstəliklərinin erkən diaqnozu və müalicəsinin gələcəkdə dəyişməsinə böyük təsir göstərə bilər.

Araşdırma nəticələri göstərir ki, süni intellekt insan beyninin funksiyalarını təqlid edən bir neyron şəbəkəsi vasitəsilə, ürək ritmi pozğunluqlarının xəbərdarlıq siqnallarını əvvəlcədən aşkar edə bilir. Bu texnologiya hələ klinik sınaqlarda qiymətləndirilməkdə olsa da, gələcəkdə xəstəxanalarda, hətta ağıllı saatlar kimi gündəlik cihazlarda istifadə edilə bilər.

Ürək xəstəlikləri səbəbindən hər il 5 milyondan çox insanın dünyasını dəyişdiyi nəzərə alındıqda, bu texnologiyanın həyat qurtaran bir təsiri ola biləcəyi vurğulanır. Həkimlər süni intellektin bu sahədəki potensialını böyük bir inqilab olaraq qiymətləndirirlər.