Mədəniyyət Nazirliyi ilə YAP arasında əməkdaşlığa dair birgə Fəaliyyət planı imzalanıb (FOTO)

Tarix: 20 May 2019 17:50

Bakı. Trend:

Yeni Azərbaycan Partiyası (YAP) ilə Mədəniyyət Nazirliyi arasında “Azərbaycanın dövlətçilik ənənələrinin yaşadılması məqsədilə vətənpərvərlik və mədəni dəyərlərə hörmət hisslərinin gücləndirilməsinə dair birgə Fəaliyyət planı” ilə bağlı sənəd imzalanıb. Sənəd 2019-2020-ci illəri əhatə edir.

Nazirlikdən Trend-ə verilən məlumata görə, tədbirdə çıxış edən Baş nazirin müavini, YAP Sədr müavini - İcra katibi Əli Əhmədov ulu öndər Heydər Əliyevin yaratdığı Yeni Azərbaycan Partiyasının təkcə siyasi sahədə deyil, ölkəmizin mədəni həyatında da mühüm rol oynadığını bildirib. Qeyd edib ki, bu gün YAP-ın ölkəmizin bütün təbəqələrini özündə birləşdirən 740 min nəfər fəal üzvü var. Partiyada xeyli sayda Azərbaycanın tanınmış mədəniyyət işçiləri təmsil olunur.

Əli Əhmədov bildirib ki, partiyanın təşkilatçılığı ilə müxtəlif mədəniyyət tədbirləri keçirilir: “Bu gün imzalanacaq sənəd də bu işdə mühüm rol oynayacaq. Prezident İlham Əliyev tərəfindən 2019-cu il ölkəmizə “Nəsimi ili” elan edilib. Tədbirlər planı çərçivəsində bununla bağlı da müxtəlif layihələr reallaşdırılacaq. Mədəniyyət və incəsənət nümayəndələri ilə qarşılıqlı fəaliyyətə yeni təkan vermək niyyətindəyik. Partiyamızın Mədəniyyət Nazirliyi ilə birgə tədbirlər keçirməsi cəmiyyətdə maraq doğuracaq. Birgə əməkdaşlıq fəaliyyətinin istiqamətlərini daha da genişləndirə bilərik. Eyni zamanda partiyamızın gənc üzvləri ilə tanınmış mədəniyyət xadimlərinin görüşləri təşkil oluna bilər”.

Mədəniyyət naziri Əbülfəs Qarayev ulu öndər Heydər Əliyevin ölkəmiz qarşısındakı xidmətlərindən danışaraq qeyd edib ki, ümummilli lider hər zaman fəaliyyətində xalqına arxalanırdı: "Həmişə Azərbaycan mədəniyyətinə, incəsənətinə xüsusi diqqət və qayğı ilə yanaşan ulu öndər onun inkişafı, təbliği istiqamətində mühüm addımlar atıb. Bu gün bu siyasət Prezident İlham Əliyev tərəfindən layiqincə davam etdirilir. Birinci vitse-prezident Mehriban Əliyeva Azərbaycan mədəniyyətinin dünyada tanıdılması üçün böyük işlər həyata keçirir. Azərbaycan xalqının ən çətin məqamında ulu öndər Heydər Əliyev ölkəyə qayıdaraq vətənimizi tənəzzüldən qurtardı. Onu inkişaf etdirərək tamamı ilə yeni bir mərhələyə qaldırdı. Bu gün ölkəmiz yeni inkişaf yoluna qədəm qoyaraq daha böyük uğurlara imza atır”.

Əbülfəs Qarayev YAP-la Mədəniyyət Nazirliyinin həyata keçirəcəyi birgə fəaliyyətin ölkəmizin mədəni həyatının daha da inkişafına xidmət edəcəyini bildirib. Təqdim olunan Fəaliyyət planının əhəmiyyətindən bəhs edən nazir bu sənəd çərçivəsində bir sıra mühüm tədbirlərin keçirilməsinin nəzərdə tutulduğunu vurğulayıb: “Yeni Azərbaycan Partiyası ilə mədəniyyət sahəsində həyata keçiriləcək bu tədbirlər ölkəmizin mədəni həyatının, insanların mədəni fəaliyyətlərdə daha geniş təmsil olunmasını təmin edəcək. Bu layihə ölkə miqyasında həyata keçiriləcək”.

Nazir vurğulayıb ki, bu gün ölkəmizin hər yerində yüksək şəraiti olan Heydər Əliyev mərkəzləri fəaliyyət göstərir: "Bu mərkəzlər gənclərimizin vətənpərvər ruhda böyüməsi, onların gələcək inkişafının təmin olunması üçün böyük bir vasitədir. Birgə əməkdaşlıq Heydər Əliyev irsinin gənc nəslə daha dolğun şəkildə çatdırılmasında böyük rol oynayacaq. Bu yaxınlarda ölkəmizdə fəaliyyət göstərən Heydər Əliyev mərkəzlərinin fəaliyyətini birləşdirən vahid portal istifadəyə verildi. Bu da özlüyündə həmin mərkəzlərin fəaliyyətini bir portaldan izləməyə imkan verir”.

Sonra Mədəniyyət Nazirliyi Xalq yaradıcılığı və mədəni marşrutların inkişafı şöbəsinin Xalq yaradıcılığı sektorunun müdiri, YAP Səbail rayon təşkilatı mədəniyyət işçiləri ilk ərazi təşkilatının sədri Vüqar Məmmədov Fəaliyyət planına dair təqdimatla çıxış edib.

Məlumat verilib ki, bu sənəd Mədəniyyət Nazirliyi tərəfindən 5 mindən çox mədəniyyət müəssisəsi, 60 min nəfərdən çox bu sahədə çalışan əməkdaş, habelə YAP tərəfindən 80-dən çox rayon təşkilatı və 740 min nəfər üzvü əhatə edəcək.

Trend-in ən mühüm və maraqlı xəbərlərini "Telegram"da izləyin