Xalq artisti: ''Bütün günü çayxanalarda vaxt keçirənlər evdə oturub ailələri ilə maraqlansalar, yaxşı olar''

Tarix: 26 Mart 2020 17:39

Koronavirus bəşəriyyət üçün elan olunmuş təhlükəli virusdur.

Sonxeber.net xəbər verir ki, bunu Trend-ə açıqlamasında Azərbaycanın xalq artisti, Azərbaycan Dövlət Mədəniyyət və İncəsənət Universitetinin dosenti, aktyor Əli Nur deyib.

O qeyd edib ki, ən inkişaf etmiş dövlətlər bu virusun qarşısında acizdir:

"Bu virus böyük-kiçik, qoca-cavan, qadın-uşaqdan asılı olmayaraq hamı üçün real təhlükədir. İnsanlar böyük bir fəlakətə düçar olublar. Bu bəlanın qarşısını almaq üçün bütün dövlətlər, dövlət rəhbərləri, ziyalılar, alimlər, bir sözlə bütün şüurlu insanlar səfərbər olublar. Hələ ki bu virusun qarşısını almaqda çətinlik çəkirlər. Azərbaycan dövləti, başda cənab Prezident İlham Əliyev olmaqla, bütün rəhbər şəxslər insanların bu bəladan qorunması üçün bütün lazımi tədbirlər görür, insanları qorumağa çalışırlar. Cənab Prezident xalqa müraciətlər edir, insanları müəyyən təhlükəsizlik qaydalarına riayət etməyə çağırır. Bu qaydalara əməl etmək vacibdir".

Xalq artisti insanları bu bəladan qurtarmaq üçün evdə oturmağı, özünü təcrid etməyi tövsiyə edib:

"Mən burdan vətəndaşlarımıza səslənirəm ki, vacib olmadığı halda evdən çıxmayın, özünüzü, ailənizi qoruyun. Bəziləri evdə oturmaqdan darıxdıqlarını deyirlər. Onlar bilməlidirlər ki, evdə oturmaqla özü və ailəsinə nə qədər fayda verir. Kompüter, mobil telefon əsri başlayandan insanlar kitab oxumaqdan yayınıb. Bu da insanların zehnini zəiflədib. Bu evdə oturan şəxslərin beyinlərini inkişaf etdirmək üçün bir şansdır. Bundan başqa, bütün günü çayxanalarda, kafelərdə, parklarda vaxtlarını keçirən insanlar evdə oturub ailələri ilə maraqlansa, daha səmərəli iş görmüş olarlar. Evinizdəki yaşlı insanları qoruyun, onlara qayğı göstərin. Bunun üçün Azərbaycan dövləti də bizə hər cür şərait yaradıb. Evdə qalan yaşlı insanlara xüsusi qayğı göstərilir, təqaüdləri, maaşları vaxtında verilir. Dövlət bunu sizin üçün edirsə, siz də özünüzün, ailənizin, yaxınlarınızın təhlükəsizliyi üçün evdə oturun, küçələrə çıxmayın".