“Onunla məni eyni tutanda qıcıqlanıram”

Tarix: 20 Aprel 2020 20:25

"Məndən sonra çıxanlar hamısı adımı çəkir ki, Anarı ötüb keçmişəm. Sonra ünvanıma deyilmişdi ki, Azərbaycanda iki stilist var: mən və o. Deməkdən ki, o, sonra mən... Ad çəkmirəm. Çox gülməlidir. O adam etdiyimin 0,3 faizini etməyib. Yollarımız fərqlidirsə, müqayisəolunmazdır. Eynidirsə, fərq çoxdur. İstər həmin şəxs olsun, istər başqası, məndə görüb kopyalayırlar".

Sonxeber.net Axşam.az-a istinadən xəbər verir ki, bu sözləri stilist Anar Ağakişiyev həmkarı Elnur Həsənov haqda "MTV Azərbaycan"da yayımlanan "Söhbətsiz" proqramında söyləyib.

Anar Elnurla müqayisə edilməyi xoşlamadığını açıqlayıb:

"Siz bu sahəyə bələd deyilsiniz deyə, o şəxs sizə çox şey deyə bilər. Belə çıxır ki, ancaq "nude" makiyajlar edir? Faktla göstərim ki, bunun harası "nude"dur? İstənilən müştəri ağır və yüngül makiyaj istəyə bilər. Peşəkar odur ki, hər bir işi bacarmalıdır. İnsanı tək makiyajla yox, təpədən-dırnağadək dəyişirəm. 5-6 ildir Biləcərini aşmışam, o aşıb? Yox!".

Anar Elnurla arasında yaranan problemin səbəbini də açıqlayıb:

"O, mənim susmağımdan istifadə edib. Münasibətimiz gözəl idi. "Eurovision" zamanı biz vizajist qrupunda işləyirdik. O, iki pillə aşağı qrupda idi. Bu, qəbahət deyil. Ruxa, mən və digər 2 nəfər yuxarı qrupdaydıq. Bir gün Neslihan Atagül Bakıya gəldi. Həmin günü Nigar Camal, Röya və Miri Yusif də orada idi. Nigar mənə dedi ki, Neslihanla görüşmək istəyirəm, atam onun fanatıdır. Girdi, onunla görüşdü. O zaman münasibətimiz var idi. Həmin ərəfədə Nigar Elnurun yanına gedib. Orada deyib ki, hər şey necə əla idi... Qarşı tərəfə deyir ki, sən niyə şəkil çəkdirmədin? O da qüruruna sığışdırmır. Demir ki, Anara yaxınlaşmağa utandım. Deyib ki, girmək istədim. Söylədilər ki, Neslihan əsəbidir. Ağlayıb, makiyajını silib bəyənməyib. Nigar da qayıdıb deyib ki, necə? Neslihanın yanında idim, bəyənmirdisə, Anar onun yanına necə gedib? Bunu da mənə Nigar təsadüfən dedi. Söylədi ki, Anar, Neslihan orada ağlamışdı, ona nə olmuşdu? Mənə niyə demirsən? Nigar bunu qəsdən deməmişdi. Dönə-dönə xahiş etdi ki, Elnura yazma, zəng etmə. Mənə yaxınlaşsaydı, Neslihana onu həmkarım kimi təqdim edərdim. Bundan sonra kimisə qısqanmağım gülməlidir.

Bu sahədə stilistlər mənim etdiyimi təkrarlamaq üçün 15 il yaşamalıdırlar. Həmin vaxtı Neslihanın ağlamağı barədə şayiəni də sayt vasitəsilə o, yayıb. Ona dedim ki, barəmdə yalan şayiə buraxmaq sənin başın üçün deyil. Ondan sonra üstündən xətt çəkdim".

Stilist bildirib ki, bu sahədə ondan çox əziyyət çəkən olmayıb:

"Elnurun iş stajı təxminən məndən 10 il daha azdır. O, özünə görə məşhurdur. Kütləsi var, amma Azərbaycandan kənarda məşhur deyil. Onunla məni eyni tutanda qıcıqlanıram. Bu işə ömrümü, enerjimi, əsəblərimi sərf etmişəm ki, Azərbaycandan kənarda tanınım.

Kiminsə övladıdır, bir insandır. Ailəsinə baxır. Allah onun və onun simasında bir çox mənə paxıllıq edən insanların ruzisini bol eləsin. Şəxsi münasibətim yoxdursa, o demək deyil ki, quyusunu qazacam. Bu yaxınlarda eyni məclisdə, bir masada oturmuşduq. O insan da əziyyət çəkir... Ancaq mənim qədərini etməyib. Desəydi ki, iki stilist var: o və mən. Heç olmasa, yarımpillə yer qoysaydı, deyərdim ki, "yazıq" dedi".

Anar ona ünvanlanan "Hansı məşhurlarla işləməmisən" sualına isə belə cavab verib:

"Zülfiyyə Xanbabayeva, Brilliant Dadaşova, Samirə Allahverdi ilə işləməmişəm. Onlar Elnurla işləyir. Zövqləri üst-üstə gəlir. Zamanında Aygün Kazımova, Röya Ayxanın ən pik vaxtlarında onlarla işləmişəm. Stilistlər var ki, xoşlayır ki, müğənnini bəzəsin, geyindirsin, çantasını götürüb onunla tədbirə getsin, mini diskini qoysun. Mən onu bacarmıram. Zamanında Aygün və Röyanı geyindirmişəm, çantasını da götürmüşəm, toya da getmişəm. Bu yaşdan sonra edə bilmərəm. Nə vaxt kəlləmi torpağın üstünə qoyaram, üstündən illər keçər, çalışdığım insanlar: hansılar ki, məlum olanlar və adlarını çəkməyə ixtiyarım olmayanların sayı qədər işləyərlər, o zaman özlərini mənimlə bir tutarlar".