''Qaydalara əməl etməməyimiz təkcə özümüz üçün yox, yaxınlarımız üçün də təhlükəlidir''

Tarix: 1 May 2020 17:36

Respublikamızda aprelin 27-dən etibarən koronavirus pandemiyası təhlükəsi ilə əlaqədar tətbiq olunan gücləndirilmiş karantin rejiminin yumşaldılması, bir sıra xidmət sahələrinin fəaliyyətinin bərpası bir-birindən təcrid vəziyyətdə qalan insanlar arasında xeyli canlanma yaradıb. Hətta bir çoxları qorxulu virusun yayılma təhlükəsinin hələ də qaldığı fərqinə varmırlar.

Sonxeber.net bildirir ki, Şamaxı rayonundan olan Əməkdar mədəniyyət işçisi Rəfail Tağızadə AZƏRTAC-a açıqlamasında tətbiq olunan karantin rejiminin yumşaldılmasının bəzi insanlar arasında arxayınçılıq yaratmasının çox təhlükəli olduğunu söyləyib: "Əlbəttə, ölkəmizdə bu qorxulu virusun yayılması təhlükəsi ilə əlaqədar ilk günlərdən görülən təxirəsalınmaz tədbirlər öz nəticəsini göstərib. Vətəndaşlarımızın kütləvi yoluxma təhlükəsinin qarşısı alınıb. Bu, hər şeydən əvvəl ciddi karantin rejiminin, insanların sosial izolyasiyasının, belə şəraitdə ehtiyacı olanlara mütəmadi olaraq yardımların göstərilməsinin nəticəsidir. Lakin unutmaq olmaz ki, koronavirus pandemiyası dünyamızı sarsıtmaqdadır. Koronavirusun ikinci dalğası bəşəriyyəti hədələməkdədir".

Rəfail Tağızadə hər kəsin ehtiyatlı olmasının, karantin rejiminin tələblərinə əməl etməsinin zəruriliyini vurğulayıb. Bildirib ki, zərurət olmadığı halda evdən çıxmağımız, sanitar-gigiyenik qaydaları gözləməməyimiz, maskalardan istifadə etməməyimiz təkcə özümüz üçün yox, yaxınlarımız üçün də təhlükəlidir.