Aktual mövzular: Dollar alış-satışı, Neftin qiyməti, COP29, Hava proqnozu

Nazir müavini: Taxıl biçiləndən sonra zəmilərin yandırılmasının heç bir elmi əsası yoxdur

Tarix: 10 Iyun 2020 11:04

Bakı. İlhamə İsabalayeva - Trend:

Taxıl biçiləndən sonra zəmilərin yandırılmasının heç bir elmi əsası yoxdur.

Trend-in məlumatına görə, bunu Ekologiya və təbii sərvətlər nazirinin müavini Firdovsi Əliyev deyib.

Onun sözlərinə görə, yanma nəticəsində torpaq qatında illərlə formalaşan, bitkilər üçün “qida anbarı” sayılan çürüntü qatına zərər dəyir:

“Fermer növbəti il üçün həmin anbarını şüurlu və ya şüursuz şəkildə yandırmış olur. Bununla da gələcəkdə məhsuldarlığın aşağı düşməsinə səbəb olur”.

Azərbaycanın dünyada az meşəli ölkələrdən biri olduğunu deyən F.Əliyev qeyd edib ki, ölkə ərazilərinin 11,8 faizi yaşıllıqla örtülüdür. Həmin ərazilərin 85 faizi dağlıqdır:

"Nəzərə almaq lazımdır ki, yanğının fəsadları dağlıq ərazilərə gedib çatdıqda texnikanın orada işləməsi mümkün olmur. Azərbaycan meşələrində 435 növ ağac və kol bitkisi növü var. 70 növ isə yalnız Azərbaycan florasında mövcuddur. Bu cür qiymətli sərvətin hansısa məsuliyyətsiz insanın törətdiyi nəticəsində məhv edilməsi hər bir Azərbaycan vətəndaşını narahat etməlidir. Biz bütün vətəndaşlara müraciət edirik ki, bu işə hamı tərəfindən nəzarət edilməlidir”.

Whatsapp ilə göndər