''Bu yanaşma sübuta yetirir ki, torpaqlarımız işğaldan azad edildikdən sonra orada bərpa işləri sürətli bir şəkildə həyata keçiriləcək''

Tarix: 21 Iyul 2020 18:45

Məlum olduğu kimi, ölkə Prezidenti "Azərbaycan Respublikasının Tovuz rayonunu Ermənistan Respublikası Silahlı Qüvvələrinin intensiv atəşə tutması nəticəsində həmin kəndlərdə yaşayan mülki əhaliyə, dövlət əmlakına, o cümlədən infrastruktur obyektlərinə dəymiş ziyanın aradan qaldırılması ilə bağlı tədbirlər haqqında" Sərəncam imzalayıb.

Sərəncamla mülki əhaliyə, dövlət əmlakına, o cümlədən infrastruktur obyektlərinə dəymiş ziyanın qısa müddətdə qiymətləndirilməsi Azərbaycan Respublikasının İqtisadiyyat Nazirliyi və Azərbaycan Respublikasının Fövqəladə Hallar Nazirliyinə tapşırılıb.

Dövlət başçısının sərəncamını Sonxeber.net-a şərh edən politoloq Elçin Mirzəbəyli bildirirb ki, sözügedən sərəncam bir neçə aspekdən mühüm əhəmiyyət daşıyır: "Azərbaycan dövləti səbəbindən asılı olmayaraq, ölkənin bu və ya digər ərazisində baş verən istənilən hadisəyə çevik rekasiya verir, yaranmış problemlərin aradan qaldırılması istiqamətində təxirəsalınmaz tədbirlər həyata keçirir.

Dövlətimiz hətta pandemiya şəraitində belə istənilən problemin öhdəsindən gələ biləcək qədər iqtisadi gücə malikdir. Dövlət siyasətimizin mərkəzində Azərbaycan vətəndaşının sağlamlığı, təhlükəsizliyi və rifahı dayanır. 2 aprel 2016-cı il görüşlərindən sonra Prezident İlham Əliyevin yeni həyat bəxş etdiyi və "Böyük Qayıdış"ın rəmzinə çevrilən Cəbrayıl rayonunun Cocuq Mərcanlı kəndində görülən işlər buna əyani misaldır. Kiçik bir kəndin ərazisində, olduqca qısa zaman kəsiyində yem emalı müəssisəsi tikilib, istixanalar və arıçılıq təsərrüfatları, inkubator məntəqəsi fəaliyyət göstərir ki, bu da əhalinin məşğulluğun tamamilə təmin olunması deməkdir.

Xatırlatmaq istəyirəm ki, Aprel döyüşlərindən dərhal Azərbaycan Prezidenti "Erməni silahlı qüvvələrinin Ağdam və Tərtər rayonlarını intensiv atəşə tutması nəticəsində mülki əhaliyə dəymiş ziyanın aradan qaldırılması ilə bağlı tədbirlər haqqında" sərəncam imzalamışdı. Dövlətimizin başçısı sərəncamdan irəli gələn işin gedişini xüsusi nəzarətə götürmüşdü. İşlərin qısa müddətdə və keyfiyyətlə görülməsi üçün bütün qüvvələr səfərbərliyə alınmışdı. Bu səbəbdən də cəmi 6 ay ərzində yaşayış məntəqələrində ciddi ziyan dəymiş evlərin və sosial obyektlərin tikintisi, təmiri və bərpası işləri başa çatdırıldı. Bu yanaşma sübuta yetirir ki, Azərbaycan torpaqları işğaldan azad edildikdən sonra həmin ərazilərdə bərpa işləri sürətli bir şəkildə həyata keçiriləcək, məcburi köşkünlərin qısa bir zaman ərzində öz evlərinə qayıdışı, bölgədə yaşayan azərbaycanlıların və özünü Azərbaycan vətəndaşı sayan istənilən şəxsin təhlükəsizliyi, firavan həyatı təmin ediləcək".